भारता आड आयर्लेण्डाचें इतिहासीक जैत

भांगरभूंय | प्रतिनिधी

आयर्लेण्ड पंगडान घरच्या मैदानाचेर खेळटना सेगीत दोन संवसारीक टी-20 सर्त जिखपी भारताक हारोवन इतिहास घडयलो. 183 धांवड्यांचो बचाव करतना टी-20 रॅंकिंगेंत पयले सुवातेर आशिल्ल्या भारताक 148 धांवड्यांचोर आडावन 34 धांवड्यांनी जैत जोडलें.

आयर्लेण्डान पयलचे खेपे भारता आड जैत जोडलां. तशेंच आयर्लेण्ड भोंवडे वयल्यान मुखेली श्रेयस अय्यराच्या नव्या पर्वाची सुरवात लजेक घालपी कामगिरी सयत जाली.

पयली बॅटींग करतना मुकेली लॉर्कन टकराचो अर्द शेंकडो आनी गेराथ डिलेनी हाणें केल्ल्या 49 धांवड्यांच्या नेटार आयर्लेण्ड पंगडान निर्धारीत 20 ओव्हरींनी 9 विकेटी व्हगडावन 182 धांवड्यो केल्यो. धांवसंख्येचो फाटलाव करतना अभिषेक शर्माक सोडलो जाल्यार एकाय बॅट्समनाक व्हड खेळी करपाक जमली ना. अखेरेक भारताचो डाव 18.5 ओव्हरींनी 148चेर सोंपलो.

श्रेयस अय्यरान टॉस जिखून पयली फिल्डिंग करपाचो निर्णय घेतलो. हर्षित राणा आनी अर्शदीप सिंग हांणी बरी बॉलींग करून आयर्लेण्डाच्या थारावीक अंतरान विकेटी घेतल्यो. तांची सातवे ओव्हरींतली स्थिती 7 4 बाद 51 अशी जाल्ली. ते उपरांत मुखेली टकर आनी बेन कॅलिट्झ हांणी पांचवे विकेटी खातीर 44 बॉलांनी 64 धांवड्यांची खेळी करून डाव सांबाळ्ळो. गेराथ-जॉर्ज हांणी 16 बॉलांनी 49 धांवड्यांची भागिदारी करून पंगडाक व्हड धांवसंख्या उबारून दिली. भारता वतीन हर्षित राणान सगल्यांत चड 3 जाल्यार अर्शदीप सिंग आनी अक्षर पटेलान 2-2 विकेटी घेतल्यो. एक विकेट शिवम दुबेक फावो जाली.

धांवड्यांचो फाटलाव करतना भारताची सुरवात बरी जाली ना. संजू सॅमसन चार बॉलांनी पांच धांवड्यो करून बाद जालो. ताची सुवात घेवपाक आयिल्ल्या इशान किशनान पांच बॉलांनी एक धांवडी करून परत तंबूंत वचपाचो मार्ग धरलो. पंगड संकश्टांत आसतना अय्यर बरी खेळी करतलो अशें दिशिल्लें. पूण, ताका लेगीत खेळपट्टीचेर चड वगत रावपाक जमलें ना. तो सात बॉलांनी तीन धांवड्यो करून बाद जालो.

अभिषेक शर्मान 20 बॉलांनी 49 धांवड्यांची खेळी केली.पूण, अर्द शेंकडो करपाक एक धांवडेची गरज आसतना तो कॅच बाद जालो. ते उपरांत तिलक वर्मा (19), शिवम दुबे (25), अक्षर पटेल (15) हांकां दोट्टी आंकडो हुपपाक जमलो. पूण, तांकां पंगडाक जैत मेळोवन दिवपी व्हड खेळी करपाक जमली ना.