भांगरभूंय | प्रतिनिधी
ग्रामपंचायतीच्या सचिवांची भेट घेवन निवेदन केलें सादर
पेडणे : पार्से गांवचो शारी क्षेत्रांत आसपाव करपा खातीर शासनान काडिल्ले अधिसुचवणेक विरोध करीत आयज पार्से ग्रामपंचायतीच्या सचिवांची भेट घेवन ग्रामस्थांनी निवेदन सादर केलें. गांवाची परंपरीक वळख, पर्यावरण तशेंच ग्रामस्वराज्य तिगोवन दवरपाक ही अधिसुचवणी रद्द करची, अशी ठाम मागणी ह्या वेळार केली.
तशेंच मोरजी, मांद्रें आनी हरमल ग्रामपंचायतींनय हे अधिसुचवणेक विरोध करून शासनाकडेन सकारात्मक अहवाल धाडचो, अशी मागणी निवेदना वरवीं केली.
ह्या वेळार महेश कांबळी, गणपत कांबळी हांचे सयत हेर ग्रामस्थ हाजीर आशिल्ले. तांणी गांवच्या हिताचे नदरेन एकवट दाखोवन प्रशासनाकडेन आपली भुमिका स्पश्टपणान मांडली.
ग्रामपंचायत सचिवांनी ह्या विशयाचेर येवपी आयतारा विशेश ग्रामसभा आपयतले अशी म्हायती दिली. ग्रामसभेंत ग्रामस्थांचीं मतां, सुचवणी आनी हरकती नोंद करून ते प्रमाण फुडलो निर्णय घेतले, अशें आस्वासन तांणी दिलें.
ग्रामस्थांनी स्पश्ट भुमिका घेवन, गांवची उदरगत आमकांय जाय, मात ताचे खातीर गांवची वळख, पर्यावरण आनी ग्रामस्वराज्य धोक्यांत येवपाक जायना, असो ठाम संदेश दिला. हाका लागून आतां आयतारा जावपी ग्रामसभे कडेन ग्रामस्थांचें लक्ष आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
