भांगरभूंय | प्रतिनिधी
म्हापशें : बस्तोड्यां लागिल्ल्या उज्यांत बिराडाक दिल्ली कूड लासून गोबोर जाली. हातूंत भांगरा वस्ती आनी घरांतलें सामान लासून व्हड लुकसाण जालें. म्हापशें उजो पालोवपी दळान येवन हो उजो नियंत्रणांत हाडलो.
ही घडणूक शुक्रारा सकाळीं सुमार ९.४५ वरांचेर घडली. घरधनी दिगंबर पिळणकार हांणी आपल्या घराचे एके कुडींत भरत विश्वकर्मा हांकां बिराडाक दवरिल्लो. सकाळीं विश्वकर्मा आनी तांची घरकान्न आपल्या दोगांय भुरग्यांक शाळेंत धाडून कूड बंद करून आपापल्या कामाक गेल्लीं. उपरांत अचकीत तांचे कुडीक उजो लागलो. ह्या उज्यांत कुडींतलें सगळें सामान लासून गोबोर जालें. तशेंच एका स्टिलाच्या डब्यांत घालून दवरिल्ल्यो भांगरा वस्तीय लासल्यो. ह्या उज्याचे घडणुकेंत विश्वकर्मा तशेंच घर धनी पिळणकार हांचें व्हड लुकसाण जालें.
हे घडणुकेची म्हायती मेळटांच म्हापशें उजो पालोवपी दळाचे हवालदार सुरज शेटगांवकार हांच्या नेतृत्वा खाला जवानांनी घडणुके सुवातेर धांव घेवन उजो पालयलो. हो उजो लागपाचें कारण आजून समजूंक ना. फुडलो तपास म्हापशें पुलीस करतात
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
