भांगरभूंय | प्रतिनिधी
मोग हो निसुवार्थी आसूंक जाय. घेवपाची अपेक्षा नासता आनी जंय फक्त दिवपाची खोस आसता, तोच खरो मोग. दुसऱ्याक सुखी करपाचे, ताका कसलेंच दुख्ख जावचें ना, हे खातीर यत्न करता, तें खरें निसुवार्थी प्रेम. मोग म्हणल्यार कोणाक तरी तालार नाचोवप न्हय. ताका फुलपाक दिवप, ताच्या अस्तित्वाचो आदर करप. शंबर नंबरी मोग हो फुलाच्या परमळा सारको. सुवास कोणाक आपणावपाची गरज ना, तो आपशीच सगल्यांक जाय जायसो अणभव दिता. त्याग हो मोगाचो आत्मो. मात असलो मोग सामको दुर्मीळ. ‘तूं म्हजें जायना जाल्यार कोणाचेंच जावपाक दिवचो ना….’ ही भावना हालींसराक वाडल्या. पुण्यां लोहगड (मावळ) प्रकरण गाजता. ‘तूं म्हाका नाका, म्हूण तुका हांव सोंपयतां’, असलो प्रकार घडला. तो करपी कोण तर व्हंकल. आतां मोगी आनी ती दोगांय बंदखणींत आसात!
मरपी केतन अगरवाल (26), सिया गोयल (20) आनी मोगी चेतन चौधरी (22) हांचे काणयेचो हो त्रिकोण. रियल इस्टेट मळा वयलीं अब्जाधीश कुटुंबां. ह्या लग्नाक 17 कोटी रुपया खर्च जावपाचे आशिल्ले खंय. केतन, सियाचो साखरपुडो फेब्रुवारींत जाल्लो. नोव्हेबरांत जयपूर पॅलेसांत लग्न. चौधरी आनी सियान मेळून केतनाक किल्ल्या वयल्यान खोल देगणांत धुकलून उडयलो, असो आरोप जाला. ताचे पयलींय उडयिल्लो, पूण तेन्ना तो झाडाक धरून लोंबकळ्ळो. सोरोप आशिल्ल्यान तुका वाटावपाक आपणे धपको दिलो, अशें सियान तेन्ना सांगिल्लें खंय! चौधरीचो बापूय म्हणटा, ‘आपल्या पुताक फटयला. तो पयस उबो आशिल्लो. सगलें कितें सियान केलां.’ ताचें लग्न थारिल्लें. सियान ट्रॅकिंगाचें निमित्त करून केतनाक लोहगडाचेर व्हेल्लो. 40 वर्सां पयलीं मुंबयचे पुलीस लंडनांतल्या पुलिसां उपरांत दुसऱ्या क्रमांकाचेर येतात, अशें म्हणटाले. आतांचें खबर ना. विज्ञान, तंत्रज्ञानाचे मजतीन पुणें पुलिसांनी बरेच पुरावे एकठांय केल्यात. सीसीटीव्ही फुटेजींत 39 अंश तापमानांत एक तरणाटो हुडी जॅकेट घालून दिसलो. फोनाचेर उलयतना हातवारे करतालो. दुबाव येवन पुलिसांनी चवकशी केली आनी प्रकरण उक्तडार आयलें. चौधरी हाॅटेलांत बसून सिया कडेन कितें उलयतालो, लोहगडाचेर तो कित्याक गेल्लो, ह्या प्रस्नाच्यो जापो पुलीस सोदतात. फोन संभाशण, मॅसेजी, व्हिडियो… सगलें तांकां मेळ्ळां. तपास चालू आसा. हाचे पयलीं असले गुन्यांव करपी स- सात म्हयन्यां भितर जामिनाचेर सुटल्यात, तशें जावचें न्हय.
संवसारांतले सगलेच तरणाटे चले, चलयो सिया, चौधरी सारके नासतात, तरीय हे घडणुकेक लागून हालींच्या कांय तरणाट्यांची वृत्ती, मानसिकतायेचेर उजवाड पडटा. मोगाच्या नांवान तरणाटे कितलो तोंकाचो निर्णय घेवंक शकता, तें दिसलें. आदल्या तेंपार घरांत खूब जाणां आसतालीं. आयज मनांतलें मेकळेपणान कोणाक सांगपाक घरांत कोण नासता. सियान निदान केतनाक तरी सांगपाचें. ते करिनासतना ताणें इश्टाचे मजतीन गुन्यांवाचो मार्ग आपणायला जाल्यार तें चुकीचें. कसलीय बरी, वायट जापसालदारकी एकामेकांचेर धुकलप वाडलां. ‘आपणें खून करूंक ना, ताणें केला’, अशें दोगांयनी पुलिसांक सांगलां खंय. तरणाट्यांक परिणाम कितें जावंक शकतात, तें खबर आसना. मागीर ते अशे फोंडांत पडटात. कायदेशीर मार्ग काडूं येतालो. पूण हालीं अतिआक्रमक वृत्ती, संयमाचो उणाव दिसता. लोकांक हिंसा आवडूंक लागल्या. भ्रश्टाचार, गैरकारभार, भेदभाव, वशिलो, बेरोजगारी हीं ताचे फाटलीं कारणां आसूं येता. सियान केतनाक आपलो ह्या चेतन चौधरीचेर मोग आसा, हें थंयच सांगूं येतालें. तें कितेंय जालें तरी तोंकाचें पावल उबारप, हाका खंयचेच परिस्थितींत माफी ना. हे घडणुकेंत दोन कुटुंबां उध्वस्त जाल्यांत. सगल्यांनीच मोग करतना दोळे उक्ते दवरप, सदांच बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
