भांगरभूंय | प्रतिनिधी
भारतांत देवीचीं जायतीं शक्तीपीठां आसात. पूण कामाख्या देवी हें नामनेचें शक्तीपीठ मानतात. आसामांतल्या गुवाहाटी शारांतल्या निलाचल दोंगुल्लेचेर हें देवूळ आसा. तें विवीध श्रद्धा, गुपीत आनी तांत्रीक म्हत्व हांचे खातीर फामाद आसा. ह्या देवळाचें खाशेलपण म्हणल्यार दर वर्सा तीन दीस हें देवूळ बंद आसता आनी ह्या वेळार हांगा दादल्यांक प्रवेश मेळना. हाचे फाटल्यान एक खाशेलो धर्मीक समज आसा..
देवीची मूर्त ना, जाता योनीची पुजा
पुराणकथां प्रमाण, भगवान विष्णून आपल्या सुदर्शन चक्रान सती देवीच्या आंगाचे ५१ कुडके केले तेन्ना तिची योनी हेच सुवातेर पडली अशी श्रद्धा आसा. देखूनच ही ५१ शक्तीपीठांतली एक मानतात. ताका ‘योनी-स्थान’ अशेंय म्हणटात. ह्या देवळाचें खाशेलपण म्हळ्यार हांगा देवीची मूर्त ना. ताचे बदला सैमीक फातरांत कोरांतिल्ले योनी आकाराचे आकृतीची पुजा गर्भकुडींत करतात. ह्या खडपांतल्यान सेगीत उदक व्हांवत आसता, जें सामकें पवित्र मानतात.
मासीक पाळी विशींची श्रद्धा
कामाख्या देवीक दर वर्सा जून म्हयन्यांत मासीक पाळी येता अशी श्रद्धा आसा. हो काळ अंबुबाची उत्सव वा अंबुबाची जात्रा म्हणून मनयतात. हो उत्सव तीन ते चार दीस चलता आनी ह्या काळांत देवळाचीं दारां बंद उरतात.
स्त्री शक्तीचो आदर
ही श्रद्धा स्त्रीत्व, सृश्टी आनी सैम हांचे विशीं आदर दिवपाचें प्रतीक आसा. मासीक पाळी खंयच्याच प्रकारान अशुद्ध मानिनात; उरफाटें ताका जिणेचो आनी नव्या जिवाची निर्मिती करपाचो उत्सव मानतात. हो काळ देवीचो विसव घेवपाचो काळ मानतात. हाका लागून कसलेच तरेची पुजा करिनात.
दादल्यांक देवळांत प्रवेश मेळना
धर्मीक समजुती प्रमाण देवीच्या मासीक पाळीच्या ३ दिसांत देवळाच्या मुखेल पुजार्यांक लेगीत गर्भकुडींत प्रवेश मेळना. हे परंपरेंतल्यान नारी सत्तेच्या ह्या खाशेल्या काळाक आदर दिता.
ब्रह्मपुत्रा न्हंय तांबडी कित्याक जाता?
ह्या काळांत कामाख्या देवळा लागसार व्हांवपी ब्रह्मपुत्रा न्हंयचें उदकूय तांबडें जाता अशें म्हण्टात. हो तांबडो रंग देवीच्या मासीक पाळीचें प्रतीक अशें भक्तांचें मत आसा.
अंबुबाची उत्सवाच्या पयल्या दिसा देवळाचीं दारां बंद करतात. गर्भकुडींत धवे कपडे दवरतात. चवथ्या दिसा तो कपडो तांबडो जाता असो समज आसा. चवथ्या दिसा देवीक न्हाणयले उपरांत भक्तां खातीर देवळाचीं दारां उक्तीं करतात. अंबुबाची कपडो म्हणून वळखपी हो तांबडो कपडो भक्तांक प्रसाद म्हणून अर्पण करतात, जो खूब शुभ आनी बळिश्ट मानतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
