मुरगांव मतदारसंघांत इत्सुकांची वळेरी वाडटा

भांगरभूंय | प्रतिनिधी

संकल्प आमोणकार, मिलिंद नायक हांचें मदींच लडटीची शक्यताय

वास्को: विधानसभा वेंचणुकेचे दीस जशे लागीं येतात, तशी मुरगांव मतदारसंघांतल्यान वेंचणूक लडोवपा खातीर इत्सूक उमेदवारांची वळेरी वाडूंक लागल्या. फाटले विधानसभा वेंचणुकेंत ह्या मतदारसंघांतल्यान काँग्रेसीचे संकल्प आमोणकार वेंचून आयिल्ले. पूण तांणी भाजपांत प्रवेश केल्ल्यान काँग्रेसीची उमेदवारी मेळोवपा खातीर इत्सूक उमेदवारांची संख्या वाडत आसा. येता ते विधानसभा वेंचणुके खातीर आदले मंत्री मिलिंद नायक आनी सद्याचे आमदार संकल्प आमोणकार हांचे मदीं सरळ लडत जातली अशें वर्सभरा पयलीं म्हणटाले. मिलिंद नायक हे खंयच्या पक्षा वतीन वेंचणूक लडयतले हें अजून तरी समजूंक ना. ते काँग्रेसी वतीन वेंचणूक लडयतले अशें उलयतात. तरी मिलिंद नायक हांणी आपलें पत्ते उक्ते केल्ले नात.

काँग्रेसी वतीन प्रदेश काँग्रेस समितीच्या ओबीसी विभागाचे अध्यक्ष शरद चोपडेंकार, अल्पसंख्याक विभागाचे आदले अध्यक्ष नझीर खान हांचीं नांवां चर्चेंत आसात. गोवा फॉरवर्डा वतीन आदले नगरसेवक निलेश नावेलकार हे वेंचणुकेच्या रिंगणांत आसतले. ते नदरेन तांची तयारी चल्ल्या. उद्देजक संजय सातार्डेकार हांचेंय नांव चर्चेत आसा. पूण ते खंयच्या पक्षा वतीन वेंचणूक लडयतले हें अजून स्पश्ट जाल्लें ना. हेर राजकी पक्षांच्या आघाडीचेर सद्या सामसूम दिसता. पूण येता त्या कांय दिसांनी कांय पक्षांचे इत्सूक उमेदवार मुखार येतले हातूंत दुबाव ना.

मुरगांव मतदारसंघाचो नियाळ घेत जाल्यार ह्या मतदारसंघांतल्यान 1967 वर्सा मगोचे गजानन पाटील हे वेंचून आयिल्ले. तांणी युगोचे एम. आर. मान्युएल हांकां हारयिल्ले. उपरांत 1972 वर्सा जाल्ले वेंचणुकेंत मगोचे वसंत जोशी वेंचून आयिल्ले. तांणी युगोच्या आनी काँग्रेसीच्या उमेदवारांक हारयिल्ले. हे वेंचणुकेंत सीपीआय (एम) वतीन जेराल्ड परेरा जाल्यार अखील भारतीय जनसंघा वतीन विश्वनाथ आर्लेकार हांणी वेंचणूक लडयिल्ली. 1977 वर्सा काँग्रेसीचे शेख हसन हरूण हांणी मगोचे उमेदवार वसंत जोशी हांकां 641 मतांनी हारयिल्लो. 1980 वर्सा शेह हसन हरूण हे मगोचे उमेदवार जगन्नाथ आरोलकार हांकां हारोवन परतून वेंचून आयले. 1984च्या वेंचणुकेंत शेख हसन हरूण हांणी मगोचे पद्मनाभ आमोणकार हांकां हारयिल्लो. 1989 वर्सा शेख हसन हरूण हे मगोचे उमेदवार जॉन मान्युएल वाझ हांकां हारोवन सेगीत चैथे फावटी वेंचून आयले. ह्या वेळार रवींद्र (बबन) परूळेकार (अपक्ष), आशा साळकार (भाजप), सीताराम मांद्रेंकार (सीपीआय) हांणी वेंचणूक लडयिल्ली. शेख हसन हरूण म्हळ्यारूच मुरगांव मतदारसंघ अशें समिकरण जाल्लें.

पूण ह्या समिकरणाक छेद दितना 1994 वर्सा जाल्ले वेंचणुकेंत जॉन मान्युएल वाझ हांणी अपक्ष म्हूण वेंचणूक लडयतना काँग्रेसीचे उमेदवार शेख हसन हरूण हांकां 2321 मतांनी हारयिल्लो. हे वेंचणुकेंत बायणा शिंदळकी वस्ती हटाव हें आंदोलन बरेंच गाजिल्लें. बायणा, सडा आनी हेर वाठारांतल्या तरणाट्यांनी एकठांय येवन वाझ हांकां वेंचून हाडिल्ले. 1999 वर्सा जाल्ले विधानसभा वेंचणुकेंत शेख हसन हरूण हांणी काँग्रेसीचे उमेदवार म्हूण वेंचणूक लडयना भाजपाच्यो उमेदवार अर्चना कोचरेकार हांकां 1023 मतांनी हारयिल्ली. हे वेंचणुकेंत जॉन मान्युएल वाझ हांणी गोंय राजीव काँग्रेस पक्षा वतीन वेंचणूक लडयिल्ली. मगो वतीन पद्मनाभ आमोणकार, युगोडेपा वतीन शेख नियाझी हनीफ जाल्यार शिवसेने वतीन शांताराम पराडकार, अपक्ष म्हूण तारा केरकार वेंचणुकेंत देंविल्ल्यो.

2002 वर्सा शेख हसन हरूण हांणी भाजपा वतीन वेंचणूक लडयली. पूण तांकां काँग्रेसीचे कार्ल वाझ हांचे कडल्यान हार घेवची पडली. हे वेंचणुकेंत राष्ट्रवादी काँग्रेसी वतीन शेख इक्बाल, मगो वतीन प्रकाश नायक हे वेंचणुकेंत देंविल्ले.

2007 वर्साचे वेंचणुकेंत काँग्रेसीचे उमेदवार कार्ल वाझ हांकां भाजपाचे उमेदवार मिलिंद नायक हांणी हारयिल्लो. मगो वतीन संजय सातार्डेकार, जेडी (एस) वतीन सिद्दाप्पा मेटी, सेव्ह गोवा फ्रंटा वतीन शेख इक्बाल हांणी वेंचणूक लडयिल्ली. त्या काळार सिद्दप्पा मेटी हांचो प्रचार करपा खातीर आदले प्रधानमंत्री देवेगौडा आयिल्ले. पूण मेटी हांकां फक्त 918 मतां मेळिल्लीं. 2012 वर्सा भाजपाचे मिलिंद नायक हे काँग्रेसीचे संकल्प आमोणकार हांकां 913 मतांनी दुसरे फावटी हारोवन दुसरे फावटी आमदार जाल्ले. हे वेंचणुकेंत नझीर खान हे वेंचणूक रिंगणांत आशिल्ले.

2017 वर्सा भाजपाचे मिलिंद नायक हांणी परतून काँग्रेसीचे संकल्प आमोणकार हांकां फक्त 140 मतांनी हारयिल्लो. हे वेंचणुकेंत आदले आमदार कार्ल वाझ हांणी आप पक्षा वतीन वेंचणूक लडयिल्ली. पूण तांकां फक्त 267 मतां मेळिल्लीं. 2022 चे वेंचणुकेंत, काँग्रेसीचे उमेदवार संकल्प आमोणकार हांणी आदले मंत्री मिलिंद नायक हांकां 1941 अशा मतांनी हारोवन फाटले दोन वेंचणुकेंतले हारीची तिडक काडली. पूण उपरांत आमदार संकल्प आमोणकार हांणी भाजपांत प्रवेश केलो.

आतां वेंचणुकेचें वारें व्हांवूंक लागलां. ह्या वेळारूय संकल्प आमोणकार आनी मिलिंद नायक हांच्याच नांवाची चर्चा सुरू आसा. मिलिंद नायक हांणी लोकांच्यो गांठीभेटी घेवपाक सुरवात केल्यात. तांचें काम थंडपणान चालू आसा. नायक हांणी फाटले पालिका वेंचणुकेंत आपले सात नगरसेवक वेंचून हाडिल्ले. ते नगरसेवक, नगरसेविका अजून नायक हांचे बराबर आसात. स्वताक भाजपा म्हणून घेवपी ह्या नगरसेवक, नगरसेवकांनी मात आमोणकार हांकां फाटल्या साडेचार वर्सांत केन्नाच तेंको दिलो ना. मिलिंद नायक हांच्या पोरणे आनी कट्टर समर्थकांच्यो बसका सुरू आसात. आमदार आमोणकार हांणीय मतदारां कडेन संपर्क सादपाक सुरवात केल्या. तांचे फाटल्यान भाजपाच्या कार्यकर्त्यांची फौज उबी आसा. ह्या मतदारसंघाचो इतिहास पळयत जाल्यार कांय आडवाद सोडून मुखेल राजकी पक्षांच्या उमेदवारां मदींच लडटी जाल्यात.

संकल्प आमोणकार हांणी भाजपांत प्रेवश केले उपरांत विकासकामांक चालना दिली. रस्त्यांचें हॉटमिक्स, भूंय गटारांचे जाळें विणपाचे यत्न, सड्या वेल्या उदकाची समस्या सोडोवपा खातीर थंय मोट्यो उदकां टांकयो बांदप, मैदानाचो विकास करप, सडा, बोगदा ह्या वाठारांतल्या लोकां खातीर वीस खाटांचें हॉस्पिटल बांदतले. डायलेसीस केंद्राची वेवस्था करतले. तशेंच हांगा कोळसो प्रदुशणाचो प्रस्न गाजत आसा. तो प्रस्न दरेक राजकी फुडाऱ्या खातीर आव्हान जाला. तो प्रस्न सोडोवपाचें आस्वासन दिलां. पूण अजून कोणाक येस आयिल्लें ना.