भांगरभूंय | प्रतिनिधी
गोंयांत सद्या कोयराचो प्रस्न सगले कडेन आपली तकली वयर काडटा. म्हापश्यां एका भुरग्यान जीव लेगीत व्हगडायलो. आमी सरकाराक दोश दीत आसात. वचत थंय कोयराची रास जावपा फाटल्यान कारण कितें ताचो विचार करपाक जाय. हाचे मुखेल कारण म्हळ्यार शिस्त. आतां आमचे भितर शिस्त ना. सध्या फुटबॉल वर्ल्ड कप सुरू आसा. बेलारूस हांगा जपान आनी नेदरलॅण्ड हांचे भितर मॅच जाल्ली. तेन्ना जपानच्या लोकांनी मॅच सोंपतकच खंय प्लास्टीक पोतयो काडून तातूंत स्टेडियमार पडिल्ल्यो प्लास्टीक बटल्यो, कागदां अशे भरून सगलो स्टेडियम निवळ केलो अशी बातमी वाचली. खरेंच तोखणाय करपाची तांची. ते लोक जर तशे करतात जाल्यार आमी कित्याक करचे न्हय. आमी कपड्यांचे बाबतीत, राहणीमान हातूंत पाश्च्यात्य संस्कृती आपणायल्या. मागीर तांचो हो नितळसाणीचो गूण कित्याक घेवचो न्हय. थंय आमी फाटीं कित्याक? कांय जाण म्हणटना दिसतात भायल्या देशांनी मरे कितले बरें. रस्त्यार खंयच कोयर दिसना. सगले कडेन निवळ. आमकां दिसता थंयचें सरकार नितळ दवरता म्हण. पूण थंयचो जण एकलो नागरीक सरकाराक नितळ दवरपाक मजत करता हे आमी विसरूंक फावना.
घरांत आमी टापटीप दवरतात तशें घरा भायरूय नितळ दवरपाक जाय. हे जण एकल्याचें कर्तव्य जावन आसा. जाणटेल्यांच्यो संवयी खऱ्योच बऱ्यो आशिल्ल्यो. ते बाजारांत वतना एक पोती घेवन वताले. कामाक गेल्यार लेगीत बॅगांत पोती दवरताले. दारांत नुस्तेकार येतालो तेन्ना भितरले आयदन हाडून नुस्तें घेतालीं, ताका लागून प्लास्टीक कमी वापरताले. आतां तशें ना. आतां सगलेंच बदल्लां. नव्यो नव्यो संवयो आमी लावन घेतल्यात. वाटे वयल्यान इशिटणी वांगडा वा सोयऱ्या वांगडा चलत वता आसतना भूक लागली म्हणप आनी दुकाना वयल्यान चिप्साचें पाकीट घेवप आनी खायत घरा वचप. आनी मागीर ती पोती रस्त्या कुशीक उडोवप. आयस्क्रीम जाल्यारूय तेंच करप. गाडयांनी वतात पूण गाडयेंत कितेंय खालें जाल्यार रिकामे कागद वा प्लास्टीक पोती जनेलांतल्यान भायर उडोवप. ह्यो वायट संवयो आमी बंद करपाक जाय.
भायल्या देशांनी जशे दंड दितात तशेंच कायशे हांगाय सुरू करपाक जाय. दुसरें म्हळ्यार गांवांनी पंचायतीं आसात. थंय त्या त्या वाठारा खातीर पंच नेमिल्लो आसता. तो पंच खरेंच आपलो वाठार नितळ दवरपाक यत्न करता काय कितें हाचेर सरकारान लक्ष दवरूंक जाय.वेंचणुको लागीं पावल्यो की सगले पंच, ताचे वांगडी अळम्या भशेन आपलीं तोंडां दाखयतात. म्हाका वेंचून दियात मागीर हांव हें करतलों, तें करतलों अशी बाता मारतात. जशे वेंचून आयले की मागीर खंयचे कडेन काय ना. आशिल्ले तशे ये रे म्हज्या मागल्या. ह्या अश्या गजालींचेर सरकारान नदर दवरपाक जाय. पंचान फक्त वेंचणुके पुरतें घरा कणकणीं वचपाचें न्हय तर प्रत्येक दिसा, प्रत्येक आठवड्याक आपलो वाठार नितळ, लोकांच्यो अडचणी सोडाेवपाक वावुरपाक जाय. लोकां भितर जागृताय करपाक जाय. तांकां कोयर उडोवपाची सोय आसा काय कितें तें पळोवपाक जाय. जाल्यारूच आपलो वाठार नितळ उरतलो.
आमीय बी पंच करतलो वा सरकार करतलें अशें म्हणून फावना. आपलो वाठार नितळ दवरपाक हातभार लावपाक जाय. सगल्यांनी एकवटान आपलो वाठार नितळ दवरपाचो यत्न करपाक जाय. ‘संघे शक्ती कलियुगे’ अशे म्हणटात ते प्रमाण वागुया आनी सुंदर गोंय तशेंच नितळ गोंय अशे सगल्या जगाक दाखोवया.
स्नेहा नाडकर्णी
8668751471
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
