भांगरभूंय | प्रतिनिधी
आयज 25 जून, भारताच्यो आदल्यो प्रधानमंत्री इंदिरा गांधी हांणी देशांत आणिबाणी लागू करपाचे घडणुकेक अायज 51 वर्सां पुराय जालीं. 51 वर्सां पयलीं म्हणल्यार आयच्याच दिसा 25 जून 1975 दिसा देशांत आणिबाणी लागू जाली. 12 जून 1975 दिसा अलाहबाद उच्च न्यायालयान इंदिरा गांधी हांची खासदारकी रद्द करून तांकां फुडलीं स वर्सां वेंचणूक लडोवपाक बंदी घाली. राजनारायण हांणी इंदिरा गांधी हांणी 1971च्या लोकसभा वेंचणुकेंत गैरवेव्हार केला असो आरोप करून खटलो दाखल केल्लो. ह्या खटल्याचो निकाल 12 जूनाक लागलो. ह्या निकाला उपरांत एक वेगळीच परिस्थिती निर्माण जाली. प्रधानमंत्री इंदिरा गांधी हांणी ह्या निर्णया आड सर्वोच्च न्यायालयांत दाद मागली. पूण सर्वोच्च न्यायालयान सुटयेच्या काळांतले न्यायाधीश व्ही. आर. कृष्ण अय्यर हांणी उच्च न्यायालयाचो निकाल यो मेरेन इंधिरा गांधींक प्रधानमंत्रीपदार रावपाची मेकळीक दिली.
हो निर्णय आयले उपरांत प्रधानमंत्री इंदिरा गांधी हांणी स्वताची सत्ता तिगोवपा खातीर 25 जून 1975 दिसाचे रातीं देशांत आणिबाणी लागू केली. आणिबाणीच्या मसुद्याचेर तेन्नाचे राष्ट्रपती फकरुद्दीन अली अहमद हांणी रातच्या बारां वरांचेर सय केली. आणिबाणी लागू जाले उपरांत इंदिरा गांधी हांच्या हातांत अनिर्बंध सत्ता आयली. माध्यमांची गळचेपी सुरू जाली. जयप्रकाश नारायण, अटलबिहारी वाजपेयी, लालकृष्ण अडवाणी, जॉर्ज फर्नांडीस, चौधरी चरणसिंग, मोरारजी देसाई, नानाजी देशमुख, मधु दंडवते, रामकृष्ण हेगडे, सिखंदर बख्त, लालूप्रसाद यादव, मुलायमसिंग यादव, रामविलास पासवान हांचे सारके व्हड फुडारी तशेंच पत्रकारांक मिसा कायद्या खाला बंदखणींत उडयले. आणिबाणीच्या 21 म्हयन्यांच्या काळांत 11 लाख लोकांक बंदखण भोगची पडली. सक्तीची नसबंदी आनी झोंपडपट्टी कुशीक काडून शारां सोबीत करपाचे मोहिमेंत लोकांचेर जुलूम, जबरदस्ती जावंक लागली. ताका लागून देशभर भिरांतीचे आनी दुबावाचें वातावरण निर्माण जालें.
सुरवातेक दहशतांत आशिल्ले नागरीक ह्या अन्याया आड उपरांत रस्त्यांचेर देंवूक लागले. समाजीक कार्यकर्ते, अभिनेते, फुडारी, कलाकार, बुद्धीवादी लोक, साहित्यीक अशे सगले लोक आणिबाणीच्या विरोधांत एकठांय आयले. सगल्या पांवड्या वेल्यान आणिबाणीक विरोध जावंक लागलो. पुराय देश आणिबाणीच्या विरोधांत एकठांय जाल्लो पळोवन इंदिरा गांधी हांणी आणिबाणी सदळ करून 1977 वर्सा लोकसभेची वेंचणूक घेतली. हे वेंचणुकेंत इंदिरा गांधी, संजय गांधी हांकां हार खावची पडली. विरोधी पक्ष आशिल्ले जनता पार्टीचें सरकार आयलें. मोरारजी देसाई हे प्रधानमंत्री जाले. पूण ह्या सरकारांत भितरल्यान व्हड प्रमाणांत विरोध आशिल्लो. हातांत आयिल्ली सत्ता ह्या विरोधी पक्षांक तिगोवंक आयली ना. फुडले वेंचणुकेंत इंदिरा गांधी परतून प्रधानमंत्री जाल्यो. आणिबाणी ही स्वतंत्र भारताच्या इतिहासांतलें काळें पर्व म्हणून वळखतात.
50 वर्सां पयलीं घडिल्ल्या दिसांतल्या घडामोडींक देशाक लोकशाये वेल्या श्रेद्धेचे म्हत्व कितें आसा हाची जाण करून दिली. भारताच्या इतिहसांतली हे घडणुकेची याद म्हणल्यार कोणाक बरें वायट थारावप नासून लोकशायेची शक्त आनी सामर्थ्य हांची याद आसा.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
