भांगरभूंय | प्रतिनिधी
फांतोडेर जाग येता. कितलो म्हूण लोळटलो? मदलीं सुमार 14 वरां दीस घालोवपाक जाय. करप कितें? कितेंय तरी करप, हातपांय हालोवप. वाट पळेत रावप. शेनवार आयताराची. शुक्रारा रातीं शूट. खंय? खंयूय. कारण? कारण कित्याक मड्याक? हेडपाक कारण, मोख, अर्थ, दिशा, तर्क कांय लागना. सगलें दशाहीन दिशाहीन. आनंद घेवपाक म्हणून वचप. भितर आसत जाल्यार तो वगडावप.
इंग्लीश भाशेंत कांय सोबीत नकसूद उतरां आसात. तातूंत पांयजणांचो कसो मधुर छुमछुमाट आयकूंक येता. हे दिशाहीन हेडणेक इंग्लीशींत lollygagging अशें म्हणटात.
मोख, अर्थ नासतना हेडप, खावप, पिवप, मजा करप हाका ‘लॉलीगॅगींग’ हें एकूच उतर वापरतात. तें वेसन एकदां लागलें म्हणटकच मागीर ताच्या आधीन जातात सगले. तरणाट्यां वांगडा म्हातारे जावंक पाविल्लेय तातूंत सामील जातात. प्रस्न तो ना. आपल्या छंदाक लागून हेरांक त्रास जातात हाचें कोणाक पडून गेल्लें आसना.
कोवीड लॉकडावना वेळार दोन वर्सां घराचे बंदखणीत भितर उरिल्ले सगले. घुस्मटले कोविडाचे, मरणाचे अनिश्चिततायेन. परिणाम भोगले. भाजले. हुलपले. अणभव घेतलो. शाणो जाता मश्णो. पिशें हेडपाचें. दौरे. भोंवप. विदेशांत टूर. तीं वतात म्हूण ह्या कुटुंबाक उणें जातात. सर्त कशी.
म्हारू आपोवन हाडप. जतनाय घेना जातकच चूड पेट्टा आनी म्हारू भितर येता. असोच एक म्हारू कोवीड महामारीचो. ताचो कोमायक्रॉन हो पिलो आसूं वा आनी खंयचोय वेरीयंट. हांव चल्लों रे म्हूण कानांत सांगून शिक्को मारून तो गेलो रे अशे तरेन घोशणा जाल्ले भशेन आमची फोल्गी जीण परती सुरू जाल्या. पार्ट्यो, जेवणां, हॉटेलां, कार्यावळी… सुरू. जण एकल्याक मेकळीक आसा. विदेशांत नायट लायफ आसा तेच पद्दतीन धरबंद नाशिल्ले भशेन, धंगण नाशिल्ले भशेन हांगाय तीच शैली आपणावपाची खुमखुमी, उर्मी. पूण संसर्ग वाडलो काय परिणाम बाकिच्यांक भोगचे पडटात.
गाडी नेटान चलयली वा सोरो, ड्रग घेवन सुसाट सोडली जाल्यार चलयतलो अपघातांत सांपडटाच, एकेकदां तो रस्त्या वेल्यान चलतल्याक वा गाडी चलयतल्याक फोंडांत घालता. ताचो जीव सोंपयता. हांगाय तेंच जालां. नाटकां सर्ती, सांस्कृतीक जोर आयिल्ले वरी कार्यावळी, संगीत मैफली ह्यो चालूच… गर्दी चालूच…
गोंयांत हालींसराक दीसपट्टें भिरांकूळ अपघात, हिंसक घडणुको, ऑनलायन तोपयो घालप, मस्ती दादागिरी, आत्मघात हीं प्रकरणां वाडल्यांत. ताचें दुख्ख पर्वा कोणाक ना काय दिसता. समाजीक भलायकेचें कोणाकूच पडूंक ना काय दिसता. व्हडल्यो व्हडल्यो गाडयो घेवप आनी पेटयत चलोवप. एकाच वांगडा तीग तीग जाण मरतात. चलोवपी मरतात वा रस्त्या वेले दुचाकीचालक वा चलत वचपी लोक मरतात. अपघात जातकच दोनूय वटांनी लांबचे लांब गाडयांच्यो रांगो लागतात. विनाकारण बाकिच्यांक दगदग. एकटो चूक करता आनी बाकिचे त्रासांत.
बेळगांवां वतना साबार घांट लागतात. आंबोली, चोर्ला, तिलारी वा अनमोड. त्या घांटाचे कुशीकच्यो धडो पावसान मोव पडून भुंये पालसणां केन्नाय निखळूंक शकतात, कोसळूंक शकता अशा स्थितींत आसतात. कितलेशेच तरणाटे थंय गाडयो वा स्कुटरी घेवन वतात आनी पावसाच्या घसघशा म्हऱ्यांत रावन फोटे, सेल्फी काडटात. ह्या पिकनिकांचें निमित्त थारता. ताका लागून कितलीं संकश्टां कोसळ्ळ्यांत, कितले जाण जीव वगडायतात तें आमी बातम्यांनी वाचत आसतात. तरणाट्यांचें रगत हून आसता. तांकां साहसी धाडसी खेळ आवडटात. पूण ते जिवार येतात, आंगलट येवं येता हाची पर्वा तांकां आसना. रातच्यो गाडयो चलोवप, दुसऱ्या राज्यांनी फोल्गां खातीर वतना, मजा करतना वाहना वयलें नियंत्रण वचप, सोरो पियेवन गाडी चलोवप ह्यो दिसपट्ट्यो घडणुको जाल्यात. शिकिल्ले लोक पार्टी करून जातकच इल्लें आसूं वा चड, वखद घेवन गाडी चलयत घरा वतात तेन्ना ते सगल्यांत पयलीं बाकीच्या वाहनांक त्रासांत घालूंक शकतात. अपघातांचो हो म्हारू दोनूय हातांनी आपयत आसतात.
पर्यटन बी बरें आसा. तें जायच. पूण ताचे वांगडा पर्यावरणाचे प्रस्न, रोगजंतूंचो संसर्ग, बुरशेपणांनी जावपी दुयेंसां आनी हेर समस्या जावंक फावना हाची जतनाय जाय. बसी एकेकदां रस्त्या कुशीक रावतात. पर्यटक थंयच रांदून जेवतात. उरिल्लो कोयर, उश्टें, कागदां, बाटल्यो, फॉयली थंयच कुशीक उडोवन हेडपाक सुरवात. चूड दाखोवन दुयेंसां आपोवप म्हणटात तीं हीं. तांकां न्ही. ते गेले आपल्या राज्यांत. हो किडो थळाव्यांक.
शिक्षणाच्या मळार फाटलीं दोन वर्सां कितें चल्लां ताका सुमार ना. आकांताची अनिश्चितताय. नीट परिक्षेच्यो भोयो भोयो जाल्यो. युपीएससी आयोगान केन्नाच न्ही इतली कठीण प्रिलीम परिक्षा आयएएस आनी हेर सेवां खातीर घेतली. ओडाताणींत भुरग्यांचो जीव सामको आबूज जाल्ले वरी जाला. गोळाक लागला. मानसीक पांवड्यार कंवळ्या पिरायेच्या भुरग्यांक समस्या उप्रासपाक लागल्यात. मानसोपचारतज्ञ हाचेर उपाय सांगत आसात. पालकांनी भुरग्यांची जतनाय घेवंक जाय न्हय? एकेच तरेचे न्हय. तरांतरांचे म्हारू आमीच आपयतात घरांत.
पयली गजाल घडूंक जाय म्हळ्यार स्वस्थ तंदुरुस्त जगप. घटमूट आसल्यार बाकी सगलें. फक्त जिमांत वचून हातांत बुकले कशे गुळे काडप ही जाली कुडीची तंदुरुस्ती. मानसीक आनी भावनीक भलायकी विसरले काय तरांतरांचे प्रस्न तयार जातात. तोच म्हारू तालगडी घालूंक लागला.
संवयो बदलच्यो पडटल्यो. आमी आमकां जाय तशीं वागतलीं, शुक्रारा आवटिंगाक टुराक वतलीं, मज्जा करतलीं, फोल्गां मारतलीं तुमचें कितें लुकसाण जाता? अशें विचारप म्हळ्यार आपसुलादपणां आनी सुबेजपणां.
‘लॉलीगॅगींग’ संवय, तरांतरांचीं वेसनां हांचे परिणाम खूब दूरगामी आसतात. गोंयची उत्तर शीम हुपून कुडाळ, रत्नागिरी, मालवण तशेंच गोंयची दक्षीण शीम हुपून माजाळी, कारवार आनी मोलें सावन बेळगांव मेरेन वीक एंडाक वचपी गोंयकारांचो आंकडो वाडत आसा.
हिप्पी आनी लॉलीगॅगींग-जिणेशैली सैमाक पसंत ना, हें सैम नवीं नवीं आव्हानां दिवन शिटकायत आसता. वेगळ्या वेगळ्या रुपांनी हीं सिग्नलां आमकां खुणायत आसतात. ते संकेत, कुरवो आनी चिन्नां समजून घेवपाची गरज आसा. शाणे जावन जतनाय घेवपाची गरज आसा.
मुकेश थळी
फाेंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
