भांगरभूंय | प्रतिनिधी
बडतर्फ केल्ले आमदार बोरकार हांच्या समर्थकांचे स्पश्टीकरण
भांगरभूंय । प्रतिनिधी
पणजीः आरजी पक्ष बंद उडोवपा विशींचो निर्णय सीईसी बसकेंत जाले उपरांत आमी आरजीपीचे वावुरपी दुखावले. देखून हे विशीं चर्चा करून स्पश्टीकरण घेवपा खातीर आमदार विरेश बोरकार जे दक्षीण गोंय प्रभारी आसात तांकां मडगांव बसकेंत निमंत्रण दिल्ले. हे बसकेक लागून आमचेर पक्ष विरोधी कारवायेचो ठपको मनोज परब हांणी दवरलो, अशें स्पश्टीकरण हाल्लींच पक्षातल्यान बडतर्फ केल्ले विरेश बोरकार हांच्या समर्थकांनी दिला.
आरजीपीचे सरचिटणीस विश्वेश नायक हांणी पक्ष विरोधी कारवायेचो ठपको दवरून विरेश बोरकार हांच्या 10 समर्थकांक पक्षांतल्यान बडतर्फ केल्ले. ह्या बडतर्फ केल्ल्या वांगड्यांनी पत्रकार परिशद घेवन आपली बाजू मांडली. ह्या वेळार प्रशांत पागी, मनीला शिरोडकार, राहूल नायक, प्रेमानंद गावडे, डॅगली फर्नांडीस, मेल्विन दा सिल्वा आनी सॅम नायक हाजीर आशिल्ले.
सीईसी बसकेंत पक्ष बंद उडोवपा विशीं चर्चा जावन बसकेंत हजर आशिल्ले दर वांगड्यां कडल्यान मत मागयले. बसकेंत हजर आशिल्ल्या दोन वांगड्यांनी आमकां ही गजाल सांगली, अशें डॅगली फर्नांडीस हांणी सांगलें.
ही गजाल आमकां सोंसपा भायर आसली देखून आमी सगळ्यांनी मडगांवां एक बसका आपयली. हे बसकेंक आमी विरेश बोरकार हांका निमंत्रण दिल्ले. फकत आमदार म्हूण न्हय तर दक्षीण गोंय प्रभारी म्हूण आमी तांकां हो विशय समजावन सांगपा खातीर आपयिल्ले. पूण पक्षान आमचेर पक्ष विरोधी ठपको दवरलो. पक्षाच्या मुळाव्या वांगड्या बरोबरच चर्चा करनासतना सीईसी हो निर्णय घेवपाक शकना, अशें रजाव डॅगली हांणी दिले.
पक्ष बंद उडोवं नाकात, कोणाक काडूं नाकात आनी सोशल मिडीयाचेर बोवाळ घाल नाकात अशें सीईसी बसकेंत सांगिल्ल्याचे आदले सीईसी वांगडी प्रेमानंद गावडे हांणी सांगलें.
10 एप्रिलाक जाल्ले बसकेंत पक्ष बंद उडोवपा विशीं सगळे जाण उलयल्यांत. जे कितें हांवेन बसकेंत आयकला ते हांव उलयता. हांवेन कटमगाळ दादाकडे गाराणे आनी मंगेशाकडे नाल्ल फोडला. हांव सत उलयता म्हाका भिरांत ना. पूण सीईस हांणी देवा मुखार येवन स्पश्टीकरण दिवचे, अशें आव्हान गावडे हांणी केलें.
सध्या आमकां पक्षातल्यांन बडतर्फ करपाचो आदेश फकत सोशल मिडीयाचेर काडला. आमकां हे विशीं कसलीच नोटीस मेळूंक ना. पक्षाच्या ह्या निर्णयाक कायदेशीर आव्हान दितले, अशीं शिटकावणी सॅम नायक हांणी दिली.
39 (अ) आंदोलन बंद उडोवपाचे मनोजाचे कट
39 (अ) आंदोलना वेळार विरेश बोरकार हांची भलायकी इबाडल्या अशें सांगून मनोज परब हांणी साखळी उपोशण करपाचे सुचयिल्ले. बोरकार हांचे जाग्यार युरी आलेमांव ह्या उपोशणाक बसतले जाल्यारुच मुख्यमंत्री मागणी मान्य करतले, अशें मनोज हांणी सांगून 39 (अ) आंदोलन बंद उडोवपाचो तांचो हायेस आसलो, असो आरोप सॅम नायक हांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
