भांगरभूंय | प्रतिनिधी
रस्तो सुरक्षा मंडळाच्या बसकेंत जाल्ली मागणी
भांगरभूंय । प्रतिनिधी
पणजी : राज्यांत अपघातां सयत अपघातांत मरण येवपी लोकांचो आंकडो वाडत आसा. रेंट ए कॅब तशेंच पर्यटकांच्या गाडयांक बरेच खेपो अपघात जाल्ले आसा. पॅट्रोलींग वा येरादारीचेर नदर दवरतना येरादारी पुलिसांनी रेंट ए कॅब तशेंच पर्यटकांच्या गाडयांचेर नदर दवरपाची मागणी रस्तो सुरक्षा मंडळाच्या बसकेंत जाल्ली. रस्तो सुरक्षा मंडळाचे वांगडी रोलँड मार्टिन्स हांणी ही म्हायती दिली.
येरादारी वेवस्थापन तशेंच अपघातांचेर नियंत्रण दवरपा विशीं रस्तो सुरक्षा मंडळाच्या बसकेंत बरेच खेपो चर्चा जाल्या. हातूंत रेंट ए कॅब तशेंच पर्यटकांच्या गाडयांचो विशय चर्चेक आयला. बऱ्याच पर्यटकांक रस्त्याची कल्पना आसना. रेंट ए कॅब वाहन चलयतना तांकां त्या वाहनाची लेगीत सवय नासता. हाका लागून तांचे गडबडीत भर पडटा. सध्या पर्वरी फ्लायओवरा सयत बरेच कडेन रस्त्याची कामां सुरू आसा. हाका लागून अनवळखी वाहन चालकांची चड गडबड जाता. रेंट ए कॅब तशेंच पर्यटकांच्या गाडयांक बरेच अपघात जाल्ले आसा. हे फांटभूयेर रस्तो सुरक्षा मंडळाच्या बसकेंत हे मागणेचेर चर्चा जाल्ली. इतले मजगती रेंट ए कॅब तशेंच अनवळखी चालकांक लागून बरेच अपघात जाल्ल्याची म्हायती येरादारी पुलीस अधीक्षक प्रबोध शिरवयकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
