भांगरभूंय | प्रतिनिधी
पणजीः स्मार्ट मिटर बलोवपाची प्रक्रिया रद्द करपाची आनी अतिरिक्त भार वापरल्यार दंड शुल्क माफ करपाची अधिसुचोवणी काडची अशी मागणी करुन अमित पाटकार, आमदार कार्लुस फेरेरा आनी हेरांनी वीज खात्या मुखार आंदोलन केलें. ह्या वेळार पुलिसांनी आंदोलन करप्यांक कार्यालयांत प्रवेश दिवंक ना. आंदोलकांनी सुमार तीन वरां खात्याच्या मुखेल प्रवेशदाराचेर बसून आंदोलन केलें. हाचे उपरांत दोन दिसांनी शुल्क माफ करपाची अधिसुचोवणी जारी जातली अशें मुखेल अभियंते स्टीफन फर्नांडीस हांणी सांगलें. स्मार्ट मीटर बसोवपाची प्रक्रिया स्थगीत केल्या अशेंय तांणी सांगलें.
हाचे आदीं पाटकार हांणी सांगलें, राज्यांत कितले स्मार्ट मिटर लायल्यात हाचेर मुख्यमंत्री, वीज मंत्री आनी मुख्य अभियंते हांच मदीं एकमत ना. सगळेच वेगवेगळे आंकडे दितात. हे प्रक्रियेंत घोटाळो जाला अशें आमी पयलीं सांगिल्लें. ही प्रक्रिया स्थगीत करची न्हय तर पुरायपणान रद्द करची आनी अतिरिक्त भार वापरिल्ल्याचो दंड माफ केल्ल्याची अधिसुचोवणी जारी करची अशी आमची मागणी आसा. हे खातीर आमी आयज मुखेल अभियंत्याक मेळपाक आयिल्ले. पूण हांगाच्या पुलिसांनी आमकां तांकां मेळूंक दिवंक ना. ही भाजपा सरकाराची हुकूमशाय आसा. आमी तोंडी आश्वासनांचेर विस्वास दवरनात. देखूनच आमी अधिसुचोवणी काडपाची मागणी करतात.
स्टीफन फर्नांडीस हांणी सांगलें, स्मार्ट मिटर बसोवपाची प्रक्रिया स्थगीत करपाचो निर्णय सरकाराचो आशिल्लो. ही प्रक्रिया कायमची रद्द करची काय ना हें सरकार थारायतलें. खात्यान सुमार एक लाख स्मार्ट मीटर घेतल्यात. तातूंतले 45 हजार मीटर बसयल्यात. नोव्हेंबर सावन अतिरिक्त भार वापरिल्ल्यान खात्यान दंड घेवपाक सुरवात केल्ली. मुख्यमंत्र्यान दंड माफ करपाचो निर्णय घेतले उपरांत सुदारीत बिलां तयार करपाक कांय वेळ लागता. दंड माफ करपाचे फायलीचेर वीज मंत्र्यान सय केल्या. सध्या ही फायल मुख्यमंत्री कार्यालयांत आसा. दंड माफ करपाची अधिसुचोवणी आयज वा फाल्यां जारी जातली.
आमदार कार्लुस फेरेरा हांणी सांगलें, वाडिल्ल्या वीज बिलांक लागून लोकां मदीं असंतोश निर्माण जाला. लोकांक स्मार्ट मिटर नाका. अशे आसतना तांकां सक्ती करप योग्य न्हय. लोकांच्या भावनांचो विचार करून सरकारान स्मार्ट मिटर बसोवपाची वेवस्था रद्द करची.
43 कोटी रुपयांचो दंड
राज्यांतल्या 7 लाख वीज गिरायकां मदल्या सुमार 70 हजार वीज गिरायकांक दंड दिला. अतिरिक्त भार वापरिल्ल्यान जारी केल्ल्या दंडाची रक्कम सुमार 43 कोटी रुपया आसा. स्मार्ट मिटर रद्द केल्यार ताचे वांगडा येवपी हेर केंद्रीय निधी मेळचो ना अशें स्टीफन फर्नांडीस हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
