भांगरभूंय | प्रतिनिधी
म्हापशेंः उत्तर गोंयांतल्या मालमत्तेच्या वेव्हाराच्या प्रकरणाची चवकशी करतना पुलीस अधिकारांचो गैरवापर जाल्ल्याचो आरोप करुन गुन्यांव फांट्याचे पुलीस अधीक्षक (एसपी) आनी दोन पुलीस निरिक्षकां सयत कांय खाजगी व्यक्तीं आड न्यायालयांत कागाळ केल्या. कागाळींत संबंदीत अधिकाऱ्यां आड गुन्यांव नोंद करपाचो आदेश दिवपाची मागणी केल्या. हातूंत गुन्यांवकारी कट, खंडणी, धमकी, बेकायदेशीर ताब्यांत घेवप, पदाचो गैरवापर आनी पुलीस सत्तेचो गैरवापर केल्ल्याचे आरोप आसात. 10 जुलयाक म्हापशेंच्या पयल्या वर्ग न्यायालयांत ह्या प्रकरणाची सुनावणी जातली.
ही कागाळ भारतीय राष्ट्रीय सुरक्षा संहितेच्या (आयएनएससी), 2023 च्या कलम 175 (4) खाला न्यायिक दंडाधिकारी पयलो वर्ग (जेएमएफसी), म्हापशें न्यायालयांत दाखल केल्या. म्हायती प्रमाण गुन्यांव फांट्यांत नोंद आशिल्ल्या मालमत्ता वेव्हारा कडेन संबंदीत फटवणूक, विस्वासघात, बनावट कागदपत्रां तयार करप आनी हेर गुन्यांवांची चवकशी करतना कागाळदाराक रायबंदर हांगाच्या गुन्यांव फांट्यांत व्हेल्लो. त्या वेळार कागाळदाराक औपचारीक अटक करिनासतना कितलेशीच वरां पुलिसांच्या ताब्यांत दवरलो असो आरोप आसा.
कागाळी प्रमाण, कागाळदाराक अटक आनी चड काळ बंदखणीचो भंय घालून ताचेर चेपण हाडले. न्यायालयान जारी केल्ल्या जामीन नाशिल्ल्या वॉरंटाच्या आदाराचेर ताका धमकायलो अशेंय सांगलां.
ते भायर मालमत्तेच्या वादा संबंदी आशिल्ल्या कांय खाजगी व्यक्तींक आनी तांच्या कायदेशीर प्रतिनिधींक गुन्यांव फांच्याच्या कार्यालयांत कागाळदाराक मेळपाची परवानगी दिली. ह्या काळांत व्हड प्रमाणांत वेव्हार, धनादेश जारी करप आनी बरयल्ल्या हमीपत्रांचेर स्वाक्षरी घेवपाची प्रक्रिया जाल्ल्याचो आरोप कागाळींत केला.
कायदेशीर तपास करचे परस खाजगी अर्थीक वसुली खातीर पुलीस यंत्रणेचो वापर केल्लो असो दावो कागाळींत केला. तशेंच वरिश्ठ अधिकारी फकत सुपरवायझर न्हय तर कथित चेपण आनी धमकीच्या कारवायांनी सक्रीय वांटेकार आशिल्ले असोय आरोप केला.
ह्या प्रकरणाची खरी परिस्थिती स्पश्ट करपा खातीर गुन्यांव फांट्याच्या पुलीस स्टेशनाचे सीसीटीव्ही फुटेज, स्टेशनाची डायरी नोंदी, ड्युटी रजिस्टर, पुलीस कर्मचाऱ्यांच्या नेमणुकेचो तपशील आनी हेर अधिकृत कागदपत्रां न्यायालयांत सादर करपाची मागणी कागाळदारान केल्या.
मजगतीं, कागाळींतले आरोप प्राथमीक पांवड्यार आसात आनी न्यायालयान अजून ताचेर निर्णय दिवंक ना. कागाळींत उल्लेख केल्ल्या सगल्या संबंदीतांक न्यायालय आनी तपास एजन्सी मुखार आपली बाजू सादर करपाची संद मेळटली. ह्या प्रकरणाची फुडली सुनावणी 10 जुलयाक म्हापशेंच्या पयलो वर्ग न्यायालयांत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
