भांगरभूंय | प्रतिनिधी
पुणेः पुणेच्या लोहगड किल्ल्याचेर इंदूरांतल्या प्रसिद्ध राजा रघुवंशी हत्ये सारकी एक धक्को दिवपी घडणूक परतून एक फावट घडल्या. 26 वर्सां पिरायेच्या केतन विशाल अग्रवाल हाची सिया गोयल (20) आनी तिचो मोगी चेतन चौधरी (22) हांणी हत्या केल्ल्याचो आरोप पुलिसांनी केला. दुबावितान केतनाक किल्ल्यांवेल्यान सुमार 400 फूट खोल देगणांत धुकल्लो आनी हो एक अपघात आशिल्ल्याचे नाटक केलें अशें पुलिसांनी सांगलें.
केतन 18 जुनाक सिया वांगडा पुण्यांतल्या लोहगड किल्ल्याचेर ट्रेकिंग करपाक गेल्लो आनी उपरांत ताची कूड देगणांत मेळ्ळी. दोगांयच्या कुटुंबाच्या संमतीनूच लग्न थारिल्ले आनी दोगांयच्या घरांत लग्नाची तयारी सुरू जाल्ली. लग्नाक सोयऱ्यांक हाडपा- व्हरपा खातीर दोन चार्टर्ड विमानांची वेवस्था केल्ली. कुटुंबां लग्नाक सुमार 17 कोटी रुपया खर्च करपाची आशिल्ली अशें मीडिया रिपोर्टांनी म्हणलां.
महाबळेश्वर आनी बालीची येवजण आशिल्ली
केतन आनी सिया लग्नाच्या आदीं बाली भोंवडेर वचपाचीं आशिल्लीं आनी ताचे खातीर सगळ्यो बुकींग लेगीत पुराय जाल्ल्यो. पूण सियान आपलो पासपोर्ट शेणला अशें सांगून ती भोंवडी रद्द केली. हाचे भायर केतनान सियाच्या वाडदिसा खातीर महाबळेश्वरांतल्या एका लक्झरी रिसॉर्टांत 40 कुडीं बुक केल्ल्यो आनी लोहगड किल्ल्याचेर ती प्री-वेडिंग फोटोशूट करपाची आशिल्ली.
हत्या करपाचो दुसरो यत्न
पुलिसांच्या चवकशे वेळार मेळिल्ले म्हायती प्रमाण, सिया आनी तिचो मोगी चेतन हांणी पयली 14 जून दिसाच लोहगड किल्ल्यांत केतनाक मारपाची येवजण आंखिल्ली. त्या दिसा दोगांयनी सोरपाचो भंय दाखोवन ताका देगणांत धुकलपाचो यत्न केलो, पूण तांची येवजण अपेशी थारली आनी त्या वेळार केतनाक कांयच दुबाव आयलो ना. हाचे उपरांत 19 जून दिसा सियान परतून एक फावट ट्रेकिंगाक वचपाची येवजण आंखली आनी केतनाक किल्ल्यांतल्यान सकयल धुकल्लो अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
