भांगरभूंय | प्रतिनिधी
वॉशिंग्टन: अमेरिकेचे राष्ट्राध्यक्ष डोनाल्ड ट्रम्प हांकां इराण धोरणाक लागून व्हड राजकी धपको बसला. रिपब्लिकन पक्षाचे भोवमत आशिल्ल्या अमेरिकन सिनेटान 50 आड 48 मतांनी थाराव मंजूर करून ट्रम्प प्रशासनाक इराणा आड लश्करी कारवाय थांबोवपाचे निर्देश दिल्यात.
विशेश म्हणल्यार सुसान कॉलिन्स (मेन), लिसा मर्कोव्स्की (अलास्का), बिल कॅसिडी (लुईझियाना) आनी रँड पॉल (केंटकी) ह्या चार रिपब्लीकन पक्षातल्या सिनेट वांगड्यांनी ह्या थारावाचे वटेन मतदान केलें. जाल्यार डेमोक्रॅट पक्षाचे सिनेटर जॉन फेटरमन हांणी ह्या थारावाक विरोध केलो.
पेनसिल्व्हेनियाचे डेव्ह मॅककॉर्मिक आनी केंटकीचे मिच मॅककॉनेल हे दोन रिपब्लीकन वांगडी मतदाना वेळार गैरहजर आशिल्ल्यान हो थाराव मंजूर जावपाक मजत जाली. हाचे आदीं झुजाच्या थारावांक तेंको दिवंक नाशिल्ल्या कांय वांगड्यांची भुमिका पळोवनय ह्या मतदानान खाशेलें लक्ष ओडलें. अमेरिकेच्या प्रतिनिधी सभाघरांत हाचे पयलीं हो थाराव 215 आड 208 मतांनी मंजूर जाल्लो. थंय चार रिपब्लीकन वांगड्यांनी थारावाक तेंको दिल्लो.
अधिकाऱ्यांच्या म्हणण्या प्रमाण 7 एप्रीलाक जाल्ल्या झुजविराम कराराक लागून अमेरिका आनी इराण हांचे मदली दुस्मानकाय थांबयिल्ल्यान सध्या अमेरिकेचीं सैन्या फाटीं घेवपाचो प्रस्न उप्रासना.
पूण ट्रम्प प्रशासनान काँग्रेसीच्या इत्सेचो आदर करपा खातीर सगळ्या कायदेशीर पर्यायांचेर विचार करतले अशी शिटकावणी डेमोक्रेट पक्षान दिल्या. ह्या थारावाचे प्रायोजक आनी डेमोक्रॅट पक्षाचे फुडारी ग्रेग मीक्स हांणी सांगलें, काँग्रेसीन ह्या झुजाक केन्नाच मंजूरी दिवंक ना. देखून काँग्रेसीचे संमती बगर झुज चालू दवरपाचो राष्ट्राध्यक्षांक अधिकार ना अशें तांणी म्हणलें.
मजगतीं, फाटल्या सप्तकांत अमेरिका आनी इराण हांचे मदीं तीन म्हयन्यां परस चड काळ चलपी संघर्श सोंपपा खातीर शांतताय कबलात जाली. डोनाल्ड ट्रम्प आनी इराणाचे राष्ट्राध्यक्ष मसूद पेजेशकियन हांणी डिजिटल पद्दतीन कराराचेर स्वाक्षरी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
