भांगरभूंय | प्रतिनिधी
विद्युत भवनांत हाजीर रावपाचें अमीत पाटकार हांचें आवाहन
पणजी: स्मार्ट मिटराची कार्यवाही स्थगीत दवरपाचे आदेश मुख्यमंत्री डॉ. प्रमोद सावंत हांणी वीज खात्याक दिल्ले आसले तरी हे विशींची अधिसुचोवणी जारी जावंक ना. स्मार्ट मिटरा विशीं अधिसुचोवणेची जाप प्रदेश काँग्रेसीचे आदले अध्यक्ष अमीत पाटकार आयज मुखेल वीज अभियंत्यांक विचारतले. हाचे खातीर लोकांनी सकाळी विद्युत भवनांत जमचें, अशें आवाहन तांणी केलां.
प्रदेश काँग्रेस अध्यक्षपदा वेल्यान कुशीक काडले उपरांत अमीत पाटकार हे आयज पयलेच खेपे जाप विचारपा खातीर सरकारी कार्यालयांत वतले. काँग्रेस पक्षांत रावून लोकां खातीर लडो दिवप सुरूच उरतलें, अशें तांणी स्पश्ट केलें.
लोडाच्या पेनल्टीक लागून बऱ्याच जाणांक चड बील आयलें. मुख्यमंत्र्यांनी स्मार्ट मिटर तशेंच चड बिलांचो नियाळ घेवन स्मार्ट मिटर स्थगीत दवरपाचे आदेश दिले. लोड वाडोवपा खातीरची पेनल्टी लेगीत तांणी रद्द करपाचे आदेश दिल्यात. हे विशींची अधिसुचोवणी जारी जावंक ना. अधिसुचोवणे विशीं अमीत पाटकार आयज खात्याच्या अधिकाऱ्यांक जाप विचारतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
