भांगरभूंय | प्रतिनिधी
वेंचणुको लागीं पावल्यो म्हणटकूच राजकारण्यांच्या वाडदिसांक सामको ओतो येता म्हणपाचें पळोवंक मेळटा. आजी, माजी आनी भावी सगलेच वाडदीस मनयतना दिसतात. वाडदिसाक कितले लोक जमतात ताचेर तांचें सगलें फुडाराचें गणीत आसता. तशें सद्याक लोकूय हुशार जाल्यात. ते भाऊल्या वाडदिसाक हाजेरी लायतात तशेंच भाईल्याय वाडदिसाक वतात. ते तशे कोणाक दुखयनात. तातूंत ह्या वाडदिसांक गेल्ल्यान लुकसाण अशें कांयच आसना. बर्थ डे बॉयाक हात दिवपाचो, ताचे वांगडा एक फोटू मारपाचो आनी ताणें दवरिल्ले पार्टेक बरें उडोवन आपली वाट धरपाची. वेंचणुकेक कितें करपाचें, कोणाक मारपाचें तें वेंचणूक येतकूच थारपाचें. तांची तरी चूक कशी म्हणपाची? ह्या आजी, माजी, भावींचे वाडदीस पांच वर्सांक एकदांच येवपाचे. बाकी वर्सां कोणाक कांय मेळपाचें ना. म्हणटकूच लोकांनीय शाणें जावचें पडलें ना?
तशेंय म्हणून फाल्यां कदेल कोणाच्या कुल्या पोंदा वचत म्हणपाचें सांगूक जायना. म्हणटकूच वोगीच कोणाकूय कित्याक म्हणून दुखोवपाचो? जो येता तोच आमचो म्हणून सांगपाचें आनी आपलें काम करून घेवपाचें हातुंतूच शाणेपणां. मात्सो म्हणून जर कोणूय दुखावलो तर तो कशे पद्दतीन सूड घेत सांगूक जायना. पळेतात न्ही आमी. कोण खंयचे बसकेक गेलो आनी ती बसका आपले आड अशें जर त्या राजकारण्याक दिसलें जाल्यार बसकेक हाजीर आशिल्ल्याचो सत्तनाश जालोच म्हणून समजुपाचें. हाकाच लागून सगलेच ‘हाताची घडी आनी तोंडाला कुलूप’ अशे तरेन रावतात. आतां ह्या वाडदिसां निमतान कोणे कितली समाजसेवा केली आनी कोणे कितलो विकास केलो तें मात आयकूंक मेळटा. आतां समाजसेवा म्हणल्यार कितें आनी विकास कित्याक म्हणटात तें मात अजून आमकां कळना.
पावसा दिसांनी कोणाक तरी कापोती आनी सत्र्यो वांटल्यो आनी भुरग्यांक चोपड्यो वांटल्यो म्हणजे जाली समाजसेवा. तेचवरी कांय कोटी मोडले म्हणजे विकास जालो हो अमचो समज. पावसाक मात्सो उशीर जालो जाल्यार उदकाचें कितें जातलें ही चिंता आमचो विकास कितलो जाला तें दाखोवन दिता. दर दिसा रस्त्यांचेर जावपी अपघात आमकां विकास दाखोवन दिता. दर दिसा वाडपी म्हारगाय आनी वाडटी बेकारी होच खरें म्हणल्यार आमचो विकास म्हणचो पडटलो. जाण्टेल्यांनी घेवन दवरिल्ल्यो जमनी फुडाराचो विचार करिनासतना विकून त्या पयश्यांनी फोल्गां मारप हाकाय विकासूच म्हणचो पडटलो. मुखा वेली पिळगी ह्या विकासा नांवान कश्यो करंदायो मारतले तें मुखार दिसतलेंच.
तर वेंचणुको लागीं पावल्यो म्हणटकूच एके वटेन वाडदिसांक ओतो येता आनी दुसरे वटेन बेबकांच्यो उडयो सुरू जातात. एका बेबकान खंय वीज मंत्र्याच्या दारार उडी मारली आनी ताची माफी मागली. नोकरी कांडाक लागून खंय ह्या बेबकान ताचेर आरोप केल्ले. सुमार पाऊणवर ताणें माफिनामा वाचलो म्हणपाचें वाचूंक मेळ्ळें. पूण तो कोण तें मात कळ्ळें ना. आतां इतल्या तेंपान माफी मागपाचें कारण कितें आसूं येता? आमचे नदरेन तरी वीज मंत्री फुडल्या मंत्रीमंडळाचो मुखेली बी जातलो अशें त्या बेबकाक दिसलां आसूं येता. वा ताका वेंचणुकेक उबो रावंक जाय. आतां वेंचणुकेक उबो रावतलो जाल्यार खंयच्याय पक्षाचें चिन्ह मेळप गरजेचें. वीज मंत्र्यान जरी कितलींय युतीचीं बातां मारलीं तरीय युतीची केन्ना माती जायत सांगूक जावचें ना.
सद्याक तरी युती सोंपतली अशींच चिन्हां दिसतात. जें फोंडें बापाय फाटल्यान पुताच्या नांवार करात म्हूण सांगून मगोन भाटिकाराक कुशीक उडयलो, त्याच फोंड्याचेर सद्याक वीज मंत्री दोळो दवरून बसला. ते वटेन मडकय पुताक आंदण दिवपाचें थारलां. प्रियोळ जर राखीव जालो तर दीपकाक शिरोडें जाय पडटलें. तांच्या बायलांकूय खंय तरी उब्यो रावच्यो पडटल्यो. कारण सद्याक गोंय विधानसभेंत जोडपींं दिश्टी पडटात. म्हणटकूच हे तरी एकटे कशे वतले? बरें दिसता तें? आतां हे सगले मतदारसंघ जाय जाल्यार युती कशी उरतली?
तातूंत मगोचीं कांय परंपरीक मतां आसात. पेडणें, मांद्रें, सांवड्डें ह्या वाठारांनी अजुनूय शींव मानपी लोक आसात. आनी हें चिन्ह सांबाळून दवरतले जाल्यार तीन तरी आमदार वेंचून येवचे पडटले. अशे वेळार युती कशी उरतली? ते वटेन महाराष्ट्रांतल्यान कांय बेबकां गोंयांत पावलीं. ते खंय तीस सिटांचेर वेंचणूक लडयतले. सद्याक तांचीय युती आसा पूण गोंयांत ते वेगळी चूल मांडूक पळेतात. तांकां कळ्ळां गोंयांत जायते लोक धोंपराक बाशींग बांदून रावल्यात. तीस कित्याक पन्नास उमेदवार सहज मेळूंक येतात. वेल्यान सद्याक खंय हे पक्ष तिकेटी विकतात म्हणपाचें आयकूंक येता. उमेदवार वेंचून येवं वा येवं नाका हांची जोड जातली. गोंयकारां कडेन नाय म्हणल्यार पयशे घोळटात. देखुनूच तर ते फाटीं सरूंक तयार आसनात.
पळोवया कोणकोण उडयो मारतात आनी कोणाकोणाच्या दारार वता तें. फाटले फावटी तृणमूलान गोंय गाजयिल्लें. उपरांत ‘टो टो फो’ जालें तें सोडात. हे फावटी कोण खंय उडयो मारता तितलेंच आमी पळोवपाचें. निमाणें आमचें मत फुकटूच वतलें हें थारलां. कारण आमच्या मतान कोणूय वेंचून येवं तो आपणाक विकूंक काडटलो हें थारिल्लेंच आसा. जेन्ना आमच्या मताक मोलूच ना तेन्ना आमी मत दिवप तरी कित्याक होच प्रस्न सद्याक सतावंक लागला. आमकां आमचें मत परतें घेवपाचो अधिकार येतलो तेन्नाच लोकशायेक आनी आमच्या मताक मोल येतलें. तो मेरेन मात बेबकां उडयो मारीत रावतलीं.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
