भांगरभूंय | प्रतिनिधी
पणजीः सोमारा रातीं आनी मंगळारा सकाळीं गोंयांत बरोच पावस झडलो. २४ वरांत चडांत चड ३.४४ इंच पावस पडलो. चडशा सुवातींनी वादळ- वार्या वांगडा व्हड पावस पडलो. हाका लागून सत्तरी, बर्देस, फोंडे, दिवचल, तिसवाडी, काणकोण आनी हेर सुवातींनी घरांचेर झाडां कोसळिल्ल्याचो घडणुको घडल्यो. तशेंच वास्को आनी हेर सुवातींनी लायट नाशिल्ली. तशेंच कांय कडेन उदक सांठून उरलें.
राज्यांत चार दीस घोग्यांनी पावसाची शक्यताय आसा. ते प्रमाण हवामान खात्यान २३ ते २६ जून ह्या काळांत राज्यांत पावसाचो ‘येलो अलर्ट’ जारी केला.
राज्यांत २४ वरांनी वट्ट ७.५५ इंच पावस पडलो. म्हापश्यां ५.१६ इंच, केप्यां ५.११ इंच, सांग्यार ४.७३ इंच, मडगांवां ४.३८ इंच आनी पेडण्यां ३.५५ इंच पावस पडलो. राज्यांत १ ते २३ जून ह्या काळांत सरासरी १०.८८ इंच पावस पडलो. मंगळारा पडिल्ल्या पावसान एका दिवसानूच सरासरी पावसाची तूट १२ टक्क्यांनी भरून काडल्या. आजूनय राज्यांत पावसाचें प्रमाण ५८.८ टक्क्यांनी उणें आसा. पावसाक लागून धरणांतलो उदकाचो सांठो वाडपाक सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
