भांगरभूंय | प्रतिनिधी
फॅटी लिव्हर हो आयज भारतीय कुटुंबांत सगल्यांत चड प्रमाणांत वाडत वचपी भलायकेचो एक व्हड प्रस्न थारता. खुबश्या जाणांक आपल्याक हें दुयेंस जालां हाची खबरूय नासता. आदीं फकत सोरो पियेल्ल्यान जाता असो समज आशिल्लें हें फॅटी लिव्हरचें दुयेंस आयज मुखेलपणान ओबॅसिटी मेटाबॉलीक इबाडाक लागून वाडतूच आसा. भारतीय दादल्यां मदीं हाचें प्रमाण बायलांचे तुळेंत चड आशिल्ल्याचें मत तज्ञांनी उक्तायलें.
मेटाहीलच्या बॅरियाट्रिक आनी लॅप्रोस्कोपिक सर्जन डॉ. अपर्णा गोविल भास्कर हांणी दिल्ले म्हायती प्रमाण, २०२१त केल्ल्या एका भारतीय अभ्यासा प्रमाण देशांतल्या सुमार ३८.६ टक्के प्रौढ नागरिकांक नॉन-अल्कोहोलीक फॅटी लिव्हर डिसीज हें दुयेंस आसा. ह्या दुयेंसाक आतां मेटाबॉलीक डिसफंक्शन-असोसिएटेड स्टिऍटोटिक लिव्हर डिसीज अशेञ म्हणटात. ओबॅसिटी, गोडेंमूताचें वा ह्या दोनूय समस्या आशिल्ल्यांक ह्या दुयेंसाचें प्रमाण ५२ टक्क्यां परस चड आसा.
दक्षीण भारतांतले गंभीर आोबॅसिटीक लागून ओबॅसिटी बॅरियाट्रिक शस्त्रक्रिया केल्ल्या दुयेतींचेर अभ्यासांत सुमार ६६ टक्के दुयेतींमदी फॅटी लिव्हरची समस्या दिसून आयल्या. चेन्नयचे एके भलायकी संस्थेन केल्ल्या अभ्यासा प्रमाण दादल्यां मदीं बायलांचे तुळेंत फॅटी लिव्हरचो धोको १.५९ पट चड आसा.
लिवर हो फकत पचनसंस्थेचो भाग न्हय. हो एक शरिरांतल्या चयापचय प्रक्रियेचें म्हत्वाचें केंद्र. विशेश म्हळ्यार पोटा भोंवतणी साचिल्ली चरबी शरीराचे तांकी परस चड वाडपाक लागल्यार ताचो सांठो लिवरांत जावपाक लागता. मुखार ही चरबी यकृतांत दाह निर्माण करता आनी मेटाबॉलीक डिसफंक्शन असोसिएटेड स्टिऍटोहेपेटायटिस हे गंभीर अवस्थेकडेन वता. मुखार हाका लागून लिव्हर फायब्रोसीस, सिर्होसीस आनी कांय प्रकरणांत यकृताच्या कर्करोगाचो धोको वाडटा.
फॅटी लिव्हराची सगल्यांत चड चिंतेची गजाल म्हळ्यार ह्या दुयेंसाचीं चडशे फावट स्पश्ट लक्षणां दिसनात. हाची म्हायती लिवराचें लुकसाण जाले उपरांतच मेळटा. नेमान लिव्हर फंक्शन चाचण्यांनीय खुबशे फावटीं कसलीच असामान्यता दिसून येना. अल्ट्रासावंड वा फायब्रोस्कॅन सारकिल्ल्या तपासण्यांतल्यानूच यकृतांत चरबी साचिल्ल्याचें समजता. थकप, पोर्टल डिसफंक्शन वा हेर चांचण्यो केल्यार हो रोग कळून येता आनी तो मेरेन हें दुयेंस खूब मुखार पाविल्लें आसता.
फॅटी लिव्हर टाळपा खातीर कितें करचें?
वजन नियंत्रणांत दवरप
शरीराचें वजन ७ ते १० टक्के उणें जाल्यार लिव्हरांतली चरबी आनी दाह मात्सो उणो जावपाक शकता. साखर आनी रिफायंड कार्बोहायड्रेट्स खावप उणें करात: प्रक्रिया केल्ले जिन्नस, पेयां आनी अल्ट्रा-प्रोसेस्ड फूड्स लिव्हरा खातीर धोक्याचीं आसा.
नेमान व्यायाम करात :
सप्तकांतल्यान उण्यात उणीं १५० मिनिटां एरोबीक व्यायाम केल्यार वजन जरी उणें जावंक ना तरी यकृतांतली चरबी उणी जावपाक मजत येता. ताचे वांगडा स्ट्रेंथ ट्रेनिंगचोय फायदो जाता.
वेळार तपासणी करात :
३० वर्सां वयर पिरायेच्या दादल्यांनी पोटाची चरबी, गोडेंमूत वा ट्रायग्लिसरायड आसल्यार दोतोराच्या सल्ल्या प्रमाण यकृताचें अल्ट्रासावंड आनी फायब्रोस्कॅन करचें.
वखदां आनी बेरियाट्रीक शस्त्रक्रिया: गंभीर ओबॅसिटी आशिल्ल्या दुयेंतीं मदीं GLP-1 आधारीत वखदां वा बॅरियाट्रिक शस्त्रक्रिया वजन उणें करपा वांगडाच फॅटी लिव्हरची खरपणा उणी करपाक आनी तो बरो जापवाक मजत जाता.
वेळार तपासणी करप हो सगळ्यांत बरो उपाय
फॅटी लिव्हराचीं लक्षणां रोखडींच दिसनात आनी देखून हो रोग नेटान वाडटा. देखून वजन आनी चयापचयाचे भलायकेचेर गंभीरतायेन नदर मारून नेमान तपासणी करप खूब गरजेचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
