भांगरभूंय | प्रतिनिधी
फाटल्या कांय दिसांनी अपघातांचेर अपघात, दुर्घटणांचेर दुर्घटणा जायत आसा. काल नेमळें- सावंतवाडी थार जिपीक अपघात जावन गिरीच्या तरणाट्याचो बाबा, आई आनी मावशी संवसाराक अंतरलीं. तो स्वता, दोग इश्ट गंभीर जखमी जाल्यात. अंदूं 1 जानेवारी ते 31 मे मेरेन 1094 अपघात जाल्यात, तातूंत 112 जाणांक मरण आयलां. भितर 82 दुचाकी चलोवपी. पोरूं ह्याच काळांत 114 जाणांक जीव व्हगडावचो पडिल्लो. 1017 अपघात जाल्ले. मरप्यां मदीं 71 दुचाकी चलोवपी आशिल्ले. चलोवपी स्वताचे चुकीन मरतात वा रस्तो इबाडिल्लो आसता. केन्नाय कसलीच चूक नासतना कोणे तरी गाडी मोखिल्ल्यान तांकां जीव व्हगडावचो पडटा. हो मरणकटो केन्ना बंद जातलो, तेंच कळना जालां.
अपघाताचो नशिबा कडेन संबंद ना, चडशे फावटी निश्काळजीपणाक लागून तो जाता. म्हणटकच गाडी चलयतना तकली जाग्यार दवरून चलोवपाक जाय. खीणभराची चूक जीव घेवंक शकता. गाडी 90 च्या जाग्यार वराक 70 स्पिडीन चलयली म्हूण चडांत चड 10 मिणटां उशीर जायत. मळब कोसळचें ना. कांय जाण भर बाजारांत पसून वाग फाटीक लागिल्ले भशेन वेगान वतात. स्वता मरतातूच, पूण दुसऱ्यांचोय जीव घेता. तातूंत आतां मोबायल फोन पळयत, जागरण करून, सोरो वा ड्रग्स घेवन गाडी चलोवप्यांचो आंकडो वाडला. घराघरांत उण्योच चार मोटारी, दुचाकी जाल्यात. एका काळार रस्तो शांत आसतालो, मात आतां तो सुटी वा आयतार सोडल्यार उंचाबळ दिसता. दर्यादेगां वयले रस्ते तर वर्साचे बाराय म्हयने भरून ओत्तात. तरीय बरेच जाण वेगान गाडयो चलयतात. ताकतीक करपाक जायना. जीव एकदांच मेळटा, वेळ परत – परत मेळटा, हें आमी, तुमी मतींत दवरल्यार बरें. चड करून तिशी, पंचविशींच्या तरणाट्यांनी!
पोरूं परस अंदूं (पांच म्हयन्यांची आंकडेवारी) 77 अपघात वाडले. पोरूं 70 तर अंदूं 71 दुचाकी चलोवपी गेले. रस्त्यान चलपी 13 तर पोरूं 23 मेले. पोरूं 641 गाडयांचें लुकसाण जालें, 398 जखमी आनी 138 गंभीर जखमी. अंदूं 607 गाडयो, 326 जखमी आनी 110 गंभीर जखमी जाले. सादो पांयांक हेरलायन फ्रॅक्चर जाल्यार तो सारको जावपाक म्हयनो, देड म्हयनो लागता. आंकडेवारींत, दिव्यांग जाल्लेय आसतले. म्हणल्यार अपघात तरणाटे पिळगेचें, कुटुंबांचें कितलें लुकसाण करता, तें पळयात. अपघात उणें करप खुद्द गाडयो चलोवप्यांच्या हातांत आसा. उरिल्लीं कारणां सैमीक. तरीय हॅल्मेट सक्ती, वेगाचेर मर्यादा, तो मेजपी कॅमेरे जाय. सोरो वा ड्रग्स घेवन गाडी चलोवप्यांचेर खर कारवाय करची, ताचेच वांगडा मोबायल फोन पळयत गाडी चलोवप्यांक व्हडलो दंड घालचो. सादारण पांच हजार रुपया तरी. एआय वरवीं तालांव दितात, तो बरेच फावटी चुकता. कारण पांच ते स इंच पसून गाडी मुखार गेल्ली दिसत जाल्यार 500 रुपयांचो मुल्त मोबायलाचेर येता. नेम मोडलो काय तालांव दितात, तसो रस्ते सारको दुरुस्त करिनात, लायटीची वेवस्था करिनात, त्या सरकारी अधिकाऱ्यांकूय तालांव दिवंक जाय. थारावीक जाग्यांचेर अपघात जातात, थंय सुरक्षा वेवस्था जाय. चडट्यो, मोडणां उणीं जाल्यार बरीं. शाॅर्ट कट मार्ग वाडोवपाक जाय. अशीर रस्ते रुंद करप गरजेचें. झेब्रा क्राॅसींग, स्पीड ब्रेकर असल्यो सुचोवण्यो लोकांक स्पश्ट दिसतल्यो, हाची जतनाय घेवपाक जाय. हायस्कूल, काॅलेजींनी रस्तो सुरक्षे विशीं जागृताय जाय. समाजीक संस्थांय हें कार्य बरे भशेन करूंक शकतात. ड्रायव्हरांकूय अदीं मदीं प्रशिक्षण दिल्यार बरें. पांच मिणटांची ताकतीक, जीणभराचें दुख्ख दिवंक शकता, हाची जाणीव दरेकल्यान दवरल्यार अपघातांचेर नियंत्रण येतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
