भांगरभूंय | प्रतिनिधी
पुलिसांनी चार जाणांक धरले; म्हालवज केलो जप्त
पणजी: गोंय पुलिसांच्या गुन्यांव फांट्यान एकतानगर- म्हापश्यां धाड घालून तीन देशांच्या ‘ए’ माळेंतले भारत-अ आनी श्रीलंका- अ हांचे मदली क्रिकेट मॅचीची ऑनलायन बेटींग टोळी उजवाडा हाडली. ह्या प्रकरणांत मध्य प्रदेशांतल्या उमाशंकर जोशी (42), अन्वेश सोनी (30), फैजान शेख (22) आनी हरियाणांतलो राहूल खोत (25) ह्या चार जाणांक रंगेहात धरले. हे कारवायेंत दोन लाख रुपया मोलाचे दोन लॅपटॉप, आठ मोबायल, एक रावटर आनी हेर इलेक्ट्रॅनिक्स म्हालवज जप्त केलो.
गुन्यांव फांट्यान दिल्ले म्हायती प्रमाण एकतानगर- म्हापशेंच्या एका बंगल्यांत तीन देशांचे ‘ए’ माळेंतले भारत- अ आनी श्रीलंका- अ हांचे मदल्या थेट क्रिकेट मॅचीचेर ऑनलायन बॅटींग सुरू आशिल्ल्याची म्हायती गुप्तहेरां कडल्यान मेळ्ळी.
ते प्रमाण, गुन्यांव फांट्याचे अधिक्षक राहूल गुप्ता आनी जिवबा दळवी हांच्या मार्गदर्शना खाला निरिक्षक विकास दयेकार हांच्या फुडारपणा खाला सहाय्यक पुलीस उपनिरिक्षक श्रीराम साळगांवकार, कॉन्स्टेबल संदेश वळवयकार, कृतेश किनळकार, कल्पेश तोरस्कार, नितीन गांवस, कृष्णा माडकार, शशिकांत बाधी ह्या पंगडान आयतारा 21 जून दिसा धाड घाली.
ह्या वेळार पंगडान मध्य प्रदेशांतले उमाशंकर जोशी (42), अन्वेश सोनी (30), फैजान शेख (22) आनी हरियाणाचो राहूल खोत (25) ह्या चार जाणांक ताब्यांत घेवन तांची चवकशी केली.
त्या वेळार तांणी ऑनलायन क्रिकेट बॅटींग घेत आशिल्ल्याची कबुली दिली. तशेंच पंगडान तांचे कडल्यान दोन लाख रुपया मोलाचे दोन लॅपटॉप, आठ मोबायल, एक रावटर आनी हेर इलेक्ट्रॉनिक्स म्हालवज जप्त केले. उपरांत ह्या प्रकरणांत दुबावितां आड म्हायती आनी तंत्रज्ञान कायदो आनी जुगार कायद्याच्या विवीध कलमा खाला गुन्यांव नोंद करून तांकां अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
