दोन तृतियांश भोवमता खातीर अट्टहास?

भांगरभूंय | प्रतिनिधी

बिहारांत आनी अस्तंत बंगालांत विधानसभा वेंचणुके उपरांत भाजपा कडेन मुकाबलो करतलो असो खंयचोच राजकी पक्ष उरिल्लो ना.

लोकसभेचे फाटले वेंचणुकेंत राष्ट्रीय लोकशाय आघाडेक दोन तृतियांश भोवमत मेळटलें अशी आस्त भारतीय जनता पक्षान केल्ली. पूण खंय तरी बिनसलें आनी साद्या भोवमताच्या आदाराचेर परतून एकदां राष्ट्रीय लोकशाय आघाडेन आपले सरकार घडयलें. उत्तर प्रदेश आनी महाराष्ट्रा सयत हेर कांय राज्यांनी लेगीत भाजपाक अपेक्षीत अशें येस मेळूंक ना आनी थंयच तांचो डाव फसलो. ते तुळेन विरोधी काँग्रेस आनी समाजवादी पक्षान बरी मजल मारली आनी ताका लागून विरोधक लागींच्या काळांत भाजपाक शह दिवंक शकतले अशीय चर्चा जावंक लागिल्ली. पूण खंय कितें. दोनूच वर्सांत भारतीय जनता पक्षान सगलें घुंवडावन उडयलें. आतांचे राजकी चित्र पळयत जाल्यार दोन तृतियांश भोवमता खातीर भाजपा फुडारपणा खालचे राष्ट्रीय लोकशाय आघाडेक फुडले वेंचणुके मेरेन वाट पळोवची पडटली अशी परिस्थिती उरिल्ली ना. नाजाल्यार अशेंय म्हणूं येता, की काँग्रेस आनी हेर विरोधी पक्षांच्या ‘इंडी’ आघाडीन येता ते वेंचणुके मेरेन भारतीय जनता पक्षाक भोवमता मेरेन पावपा पसून आडायत जाल्यार ते तांचें खूब मोटे येस थारतलें. भारतीय जनता पक्षान जाल्यार बेधडक राजकी चाली खेळपाक सुरवात केल्या की त्या चालींक लागून झेल विरगळचो तशेंच विरोधी पक्ष अक्षरशा विरगळटना दिसून येतात. बिहारांत आनी अस्तंत बंगालांत विधानसभा वेंचणुके उपरांत भाजपा कडेन मुकाबलो करतलो असो खंयचोच राजकी पक्ष उरिल्लो ना. बंगालांत तृणमूल काँग्रेसीचे म्हणल्यार ममता ददीचें दोन अडेज दसकां परस चड काळ चालू आशिल्लें अस्तित्वूच शुन्य जावन गेलां. हें लोक आतां महाराष्ट्रा सयत हेर राज्यांतूय पातळत चल्ल्ल्यात. अस्तित्वहीन जायत गेल्ले विरोधी पक्ष भाजपाची ही तुफानी घोडदौड कशी आडावंक शकतले हो एक मोटो प्रस्न आसा.
प्रधानमंत्री नरेंद्र मोदी हांच्या सरकारान सभाघरांत दोन तृतियांश भोवमत नासून लेगीत जी तीन घटनादुरुस्ती विधेयकां मांडपाचें जें धाडस केलें तचो फाटलो नेमको हेतू कितें आशिल्लो हें कळपाक मार्ग नासलो तरी विरोधकांच्या अंतर्मनाची पारखणी करपाची ती एक सुनियोजीत चाल वा खेळी आशिल्ली अशें म्हणूंक येतलें. विरोधा खातीर विरोध करप हें वेगळें, पूण तातूंतल्यानूय कांय सकारात्मक गजाली भाजपा खातीर मुखार आयल्यात आसतल्यो आनी ताचे उपरांतूच जें कितें घडटा तें पळयत जाल्यार केंद्र सरकार अखेरेक आपल्याक जाय तें साध्य करतलेंच हें सांगपाक आतां भविश्य सांगप्याची गरज आसा अशें दिसून येना. लोकसभेंत सुवातांची संख्या व्हड प्रमाणांत वाडोवप, ताचो संबंद महिला आरक्षणा कडेन जोडप असो सादारण प्रस्ताव आशिल्लो, पूण दोन तृतियांश भोवमताच्या उणावाक लागून सदर प्रस्ताव बारगळ्ळो. ताचे उपरांतूय कसलीच नाउमेद जायनासतना केंद्रान बदलिल्ल्या परिस्थितीचो लाव घेवन एका फाटोफाट एक अशे विरोधकांक धक्के दिले. ताका लागूनच तर दोन तृतियांश भोवमता खातीर भाजपाक फुडल्या लोकसभा मेरेन रावचें पडटलें अशें खूबशा जाणांक दिसतालें. राष्ट्रीय लोकशाय आघाडीचें सभाघरांतलें भोवमत आतां सव्वा तिनशेच्या मुखार गेलां आसून दोन तृतियांश हें लक्ष्य आतां लागीं लागीं तांच्या आटोक्यांत आयिल्लें दिसून येता. आतां उत्तर प्रदेशांतलो समाजवादी पक्ष भाजपाच्या रडाराचेर आशिल्ल्याचें दिसता. जाल्यार काँग्रेस लेगीत हातूंततल्यान कितले मेरेन सहीसलामत सुटूंक शकतली अशें दिसना. केंद्र सरकाराक आपल्या विशिश्ट मार्गान मुखार वचपाचें आसा आनी जे कोणूय ह्या मार्गांत आडमेळीं थारतात, तांचें म्हणणें समजिकायेन आयकून घेवपा बदला, प्रसंगी तांकां कुशीक दवरून मुखार वचपूच सरकाराक योग्य दिसत आशिल्ल्याचें दिसून येता.
अस्तंत बंगालांत तृणमूल काँग्रेसीचे विशेक खासदार वेगळ्याच पक्षांत प्रवेश करून आतां राष्ट्रीय लोकशाय आघाडीचे घटक जाल्यात. महाराष्ट्रांतल्या ऊबाठा शिवसेनेचे णव पैकीं स खासदार अशेच भाजपाच्या गळाक लागल्यात. आतां अजून अशेंच एखादें दुसरें ‘ऑपरेशन’ हातांत घेतले आनी तातूंत येस आयलें जाल्यार दोन तृतियांश भोवमता खातीर भाजपाक अजून दोन- अडेज वर्सा रावपाची गरज उरची ना. विरोधक आपल्या क्षीण आवाजांत बोंबलेच्या देंठा सावन सरकारा आड आड्डी मारीत आसले तरी तातूंतल्यान कांयच साध्य जावपाचें ना हाचीय कल्पना आसा. लोकसभेच्या वांगड्यांची संख्या सरकाराक साडे आठशें मेरेन वाडोवपाची आसा आनी तांणी ‘रोख सके तो रोख ले’ अशी शिटकावणी दिवनच पावलां उबारिल्ल्याचें दिसून येता. खासदारांची संख्या 543 वेल्यान 850 परस व्हरत जाल्यार संसदेचें चित्र कशें आसतलें हाची कल्पनाच करूंक येना. लोकसभेच्या कामकाजाचेर ताचो अनुकूल / प्रतिकूल कसलो परिणाम जातलो हाचोय काेणे अभ्यास केल्लो आयकूंक येना. पयलींच लोकसभेंत कामकाजा परस गोंदळ चड अशी परिस्थिती आसतना चर्चेची गुणवत्ता अदिकूच देंवपाची भिरांत खूबशा जाणांक दिसता. मतदारसंघांचो समतोल सादपा खातीर संख्या वाडोवप हो तंत्रीक उपाय आशिल्ल्याचें अभ्यासकांक दिसता, पूण तातूंतल्यान अपेक्षीत परिणाम साद्य जातले काय कितें हें कुतूहल ना.
पूण ह्या सगल्या घडामोडीं कडेन फक्त भाजपाच्या राजकी येशाच्या वक्लांतल्यान पळोवन चलचें ना. लोकशाय वेवस्थेंत सत्ताधारी पक्ष जितलो घटमूट आसप गरजेचो आसता तितलोच सक्षम आनी प्रभावी विरोधी पक्षूय गरजेचो आसता. सत्तेर अंकुश दवरपाचें, सरकाराच्या निर्णयांची चिकित्सक छाननी करपाचें आनी पर्यायान विचार मांडपाचें काय विरोधकां कडल्यान अपेक्षीत आसता. जर विरोधी पक्षच क्रमाक्रमान कमकुवत जायत गेलो जाल्यार लोकशायेचो समतोल इबाडपाची भिरांत उक्तायतात. ताका लागून भाजपाच्या वाडट्या ताकदी इतलोच विरोधकांचो घटत्या प्रभवाचोय अभ्यास जावप गरजेचें आसा.
दोन तृतियांश भोवमताचो प्रस्न हो फक्त आंकड्यांचो खेळ ना. त्या भोवमताच्या नेटान घटना दुरुस्तीं सारके दुरगामी परिणाम करपी निर्णय घेवपाची तांक फावो जाता. ताका लागून अशा भोवमतां फाटलीं राजकी उद्दिश्टां, तांचे परिणाम आनी तातूंतल्यान देशाच्या संसदीय लोकशाये मुखार उबे रावपी प्रस्न हांचेर व्यापक चर्चा जावप गरजेचें आसा. आयज भाजपाची वाटचाल पळयत जाल्यार हें लक्ष्य तांकां अशक्य अशें दिसना. उरफाटें तें साध्य करपा खातीर दरेक राजकी संदीचो उपेग करपाची तांची तयारी दिसता.
अखेरेक प्रस्न इतलोच आसा की भाजप दोन तृतियांश भोवमत मेळयतलो काय ना हो न्हय, जाल्यार तें भोवमत मेळोवचे पयलीं विरोधक स्वताचें अस्तित्व, आपली विस्वासार्हता आनी जनाधार कितलो मेरेन तिगोवन दवरतले हो आसा. कारण लोकशायेंत खंयच्याय पक्षाचे सामर्थ्य हें फक्त तांच्या जैताचेर निंबून नासता, जाल्यार ताका आव्हान दिवपा खातीर सक्षम पर्याय अस्तित्वांत आसात काय नात हाचेरूय ते तितलेच निंबून आसता. फुडल्या दोन- अडेज वर्सांत भारतीय राजकारणाची दिशा थारावपी हो घडये सगल्यांत म्हत्वाचो प्रस्न थारतलो.

वामन प्रभू
9823196359