भांगरभूंय | प्रतिनिधी
काँग्रेस: मायणा कुडटरी पुलीस स्टेशनार तरणाट्यांचेर हल्लो प्रकरण
पणजी: मायणा कुडटरी पुलीस स्टेशनार तरणाट्यांचेर जाल्ल्या अन्याया विशीं पुलिसांक निलंबीत केल्यात. पूण त्या तरणाट्यांचेर मारपेटी सयत लैंगीक अत्याचार केल्ले. तातूंतलो एकलो नेण्टे पिरायेचो आसा. हाका लागून अत्याचार करपी पुलिसांचेर एफआयआर दाखल करची अशी मागणी काँग्रेसीचे फुडारी अर्चीत नायक हांणी केली.
काल (सोमारा) तांणी पुलीस म्हासंचालक अलोक कुमार हांची भेट घेवन तांकां हें विशींचें निवेदन भेटयलें. पुलिसांचेर कायदेशीर कारवाय जाली ना जाल्यार खर आंदोलन करपाची शिटकावणी तांणी दिली. ह्या वेळार अमीत पालेकार, प्रतिक्षा खलप आनी हेर पदाधिकारी हाजीर आशिल्ले.
अर्चीत नायक हांणी सांगलें, पुलीस लोकांचे रक्षक आसूंक जाय. पूण मायणा कुडटरेचे घडणुके उपरांत पुलीस भक्षक जायत आशिल्ल्याचें स्पश्ट जाता. हे घडणुके विशीं पुलिसांनी दुबावितांक पुलीस स्टेशनार आपोवन समज दिवंक जाय आशिल्ली. चवकशी करून तांचेर गुन्यांव नोंद करूंक जाय आशिल्ले. पूण पुलिसांनी त्या दुबातिांक जे पद्दतीन हाताळ्ळे तें सामकें चुकीचें आशिल्लें. पुलिसांनी नेमकें कितें केलें हे विशीं उक्तेपणान सांगपाची लेगीत लज दिसता. आयज जरी पुलिसांक निलंबीत केल्ले आसले तरी कांय म्हयन्यांनी तांकां परतून सेवेंत घेतले. ह्या पुलिसांचेर गुन्यांव दाखल करप गरजेचें आसा अशें तांणी म्हणलें.
अमीत पालेकार हांणी म्हणलें, मायणा कुडटरी पुलीस स्टेशनार जाल्ली घडणूक दुर्दैवी आसा. ह्या प्रकरणांत दखलपात्र गुन्यांव करून लेगीत पुलिसांचे फक्त निलंबन जालें ना. हे विशीं आमी पुलीस म्हासंचालकांक विचारलें तेन्ना तांणी पुलिसां आडची कागाळ येवंक नाशिल्ल्याचें सांगलें.
हाचे आदीं त्या तरणाट्यांनी पुलिसां आड कागाळ दिवपाक आमकां भंय दिसता अशें सांगलां. तांच्या वकिलांनी पुलीस अधिक्षकांक पत्रूय बरयलां. हाका लागून पुलीस म्हासंचालकांनी स्वता जावन कारवाय करप गरजेची आसा. पुलीस आंदोलन करपी थळाव्यांचेर एफआयआर दाखल करता. पूण आपल्या दळांतल्या अधिकाऱ्यांक राखण दिता अशें तांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
