भांगरभूंय | प्रतिनिधी
बन धनी संघटणे कडल्यान सरकाराक निवेदन सादर
पणजी : प्रलंबीत फ्यूएल सबसीडी, पणजेत स्मार्ट सीटी बस स्टँड तशेंच हेर विवीध मागण्यां खातीर २९ जुनाक धरणें आंदोलन करपाची शिटकावणी बस धनी संघटणेन सरकाराक दिल्या. संघटणेचे सरचिटणीस सुदीप ताम्हणकार हांणी हे विशींचें निवेदन सरकाराक सादर केलां. मुख्यमंत्री डॉ. प्रमोद सावंत, येरादारी मंत्री मॉविन गुदिन्हो हांचे सयत येरादारी खात्याक लेगीत निवेदनां सादर केल्यांत.
बस वेवसाय हो बरींच वर्सां गोंयकारांच्या हातान आसा. कदंबा सुरू जावचे पयलीं सावन राज्यांत खासगी बस सेवा दिता. हालींच्या दिसांनी हो वेवसाय परवडाना म्हूण बर्याच जाणांनी हो वेवसाय सोडून दिला. हाचे पयलीं संघटणेन डॉ. सावंत तशेंच येरादारी खात्या कडेन मागण्यांचीं निवेदनां सादर केल्यांत. हे भायर बसकेंत मागण्यांचेर चर्चा लेगीत जाल्या. बर्योच मागण्यो प्रलंबीत आसात. ह्यो मागण्यो पुराय करच्यो म्हूण संघटणेन परतून निवेदन (रिमायंडर) भेटयलां. ह्या मागण्यांकडेन सरकारान आडनदर केल्यार २९ जुनाक पर्वरेच्या येरादारी खात्यामुखार धरणें आंदोलन करतले, अशी शिटकावणी संघटणेन दिल्या.
गोंय राज्य बस सहायता येवजणे खाला फ्यूएल सबसीडी प्रलंबीत आसा. प्रलंबीत सबसीडी बेगीन दिवची अशी मागणी आसा. हे भायर पाटो हांगा बस स्टॅण्डाचेर उबारणी, बस स्टॅण्डाचेर चालक तशेंच कंडक्टरांक विसव घेवपा खातीर रेस्ट रूम, डिजीटल टॅक्सी धोरण जावचे पयलीं गोवा मायल्स, गोवा टॅक्सी ऍपाक मान्यताय दिवपाच्या प्रकाराची चवकशी, म्हजी बस येवजणे खातीर खासा फाटो सुरू करप, अशो मागण्यो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
