भांगरभूंय | प्रतिनिधी
पणजी : मायणा- कुडटरी पुलीस स्टेशनांत तरणाट्यांचेर जाल्ल्या अन्याया विशीं पुलिसांक निलंबीत केल्यात. मात त्या तरणाट्यांचेर लैंगीक अत्त्याचारुय जाल्ले. तांतलो एकलो नेण्टो आसा. हाका लागून ताचेर अत्याचार करपी पुलिसांचेर एफआयआर दाखल करची अशी मागणी कॉंग्रेसीचे फुडारी अर्चित नायक हांणी केली. सोमारा तांणी पुलीस महासंचालक अलोक कुमार हांची भेट घेवन तांकां हे विशीं निवेदन दिलें.
पुलिसांचेर कायदेशीर कारवाय जावंक ना जाल्यार खर आंदोलन करपाची शिटकावणी तांणी दिली. ह्या वेळार अमित पालेकार, प्रतिक्षा खलप आनी हेर पदाधिकारी हाजीर आशिल्ले. अर्चित नायक हांणी सांगलें, पुलीस जनतेचे रक्षक आसूंक जाय. मात मायणा कुडटरचे घडणुके उपरांत पुलीस ‘भक्षक’ जाल्ल्याचें स्पश्ट दिसता.
हे घडणुके विशीं पुलिसांनी दुबावितांक पुलीस स्टेशनांत आपोवन समजावपाक जाय आशिल्लें. चवकशी करून तांचेर गुन्यांव नोंद करपाक जाय आशिल्ले. मात पुलिसांनी तांकां जे तरेन हाताळ्ळे तें सामकें चुकीचें आशिल्लें. पुलिसांनी नेमकें कितें केलें हें उक्तेंपणान सांगपाकूय लज दिसता. आयज जरी पुलिसांक निलंबित केल्यात तरी कांय म्हयन्यांनी तांकां परत दळांत घेतलेच. ह्या पुलिसांचेर गुन्यांव दाखल करप गरजेचें.
अमित पालेकार हांणी सांगलें, पुलीस स्टेशनांत जाल्ली घडणूक दुर्दैवी आसा. ह्या प्रकरणांत गुन्यांव करूनय पुलिसांचें फकत निलंबन जालां. हे विशीं आमी पुलीस संचालकांक विचारलें तेन्ना तांणी पुलिसां आड एक पसून कागाळ येवंक ना, अशें सांगलें.
ह्यान पयलीं त्या तरणाट्यांनी आमकां पुलीस कागाळ दिवपाक भंय दिसता म्हूण सांगलां. तांच्या वकिलांनी पुलीस अधीक्षकांकूय पत्र बरयलां. हाका लागून पुलीस महासंचालकांनी स्वता जावन कारवाय करप गरजेचें. पुलीस आंदोलन करपी थळाव्यांचेर एफआयआर दाखल करता. मात आपल्या दळांतल्या अधिकार्यांक संरक्षण दिता, असो गंभीर आरोपूय तांणी केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
