भांगरभूंय | प्रतिनिधी
अकोला: अकोला शारांत सीबीआय अधिकारी अशें सांगून एका ७० वर्सां पिरायेच्या वेपार्याक २५ लाख रुपयांची तोपी घाल्ली. ह्या दोगूय दुबावितांक थळाव्या गुन्यांव फांट्याच्या (LCB) पंगडान १२ वरां भितर अटक करून तांचे कडल्यान पयशे आनी हेर सामान जप्त केलें.
ही घडणूक कशी घडली?
१९ जून दिसा सुमार ४ ते ५ वरां मजगती ही घडणूक घडली. खामगांवचे ७० वर्सां पिरायेचे वेपारी, जे ’पिको कॉल सेंटर’ चलयता, ते बाळापूर बस स्टँडाचेर बसीक राविल्ले. आरोपीं मदल्या एकाची वळख पिडेस्त
वेपार्या कडेन पयलीं सावन आशिल्ली. ताणें गुगलच्या आदारान सीबीआयचे फटींग वळखपत्र तयार केलें आनी सीबीआय अधिकारी म्हणून वेपार्याक फटयलो. पिडेस्त वेपारी बेकायदेशीर अर्थीक वेव्हार करता, अशें सांगून वेपार्याक त्या दुबावितान कायदेशीर कारवायेचो भंय दाखयलो आनी ताचे कडेन आशिल्ले २५ लाख रुपयांनी बॅग आनी मोबायल फोन घेतलो. वेपार्याक दुबावितान पुलीस स्टेशनांत व्हरता म्हूण सागलें.
आपली कारवाय खरी दिसची म्हणून पयल्या आरोपीन दुसर्या वांगड्याक फोन करून आपयलो. बस स्टँडाचेर तांणी वेपार्याक बसींतल्यान सकयल देंवयलो आनी रोख रक्कम आनी मोबायल घेवन पळ काडलो. सुरवातेक वेपार्याक आपली फटवणूक जाल्ल्याचें कळूंकच ना. तो पुलीस गाडयेची वाट पळयत रावलो, पूण गाडी येना ती पळोवन ताका आपल्याक तोपी घाल्ल्याची खात्री जाली. उपरांत ताणें बाळापूर पुलीस स्टेशनार कागाळ नोंद केली.
पुलिसांची तत्परताय
प्रकरणाचें खरपणान लक्षांत घेवन अकोल्याचे पुलीस अधीक्षक अर्चित चांडक हांणी ३ अधिकारी आनी २० कर्मचार्यांचो एक विशेश तपास पंगड तयार केलो. पुलिसांनी सुमार ५० सीसीटीव्ही कॅमेर्यांची फुटेज तपासली. आरोपींची वळख पटली आनी तांकां खामगांव हांगा अटक केली.
आरोपींची वळख आनी जप्ती
अटक केल्ल्या आरोपींची नांवां हार्दीक मनोज कुमार गुरबानी (२२) आनी साहिल नंदकिशोर नथानी (२५) अशीं आसात. पुलिसांनी तांचे कडल्यान २५ लाख रुपयांची रोख रक्कम, सुमार ९०,००० रुपयांचो मोबायल फोन, २ मोटारसायकली आनी हेर वस्तू जप्त केल्यात. जप्त केल्ल्या मालमत्तेची एकूण किंमत सुमार २७.५ लाख रुपया आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
