भांगरभूंय | प्रतिनिधी
नवी़ दिल्ली: आज देशभरांत NEET-UG 2026 ची परत परिक्षा जातली. हातूंत २२.७९ लाखां परस चड विद्यार्थी वाटेकार जातले. पेन-पेपर मोडांत जावपी परिक्षे खातीर ५६४ शारांनी ५४०० परस चड परिक्षा केंद्रां तयार केल्यांत. हातूंत भारतांतल्या ५५१ आनी परदेशांतल्या १२ शारांचो आसपाव आसा.
NTAप्रमाण, देशभरांतल्या परिक्षा केंद्रांचेर २ लाखां परस चड सुरक्षा कर्मचारी, ६७४ सिटी कोऑर्डिनेटर आनी ६,६६९ निरीक्षक तैनात केल्यात. पेपरफुटी आडावपा खातीर पयलेच फावट भारतीय वायुसेनेचीं विमानां आनी हॅलिकॉप्टर वापरल्यांत.
वायुसेनेन २०० परस चड उड्डाण करून NEET-UG चे प्रस्नपत्रिका देशभरांतल्या वेगवेगळ्या झोना मेरेन पावयल्यात. NEET-UG परीक्षा ३ मे २०२६ तारखेर जाल्ली, मात पेपरफुटीच्या आरोपा उपरांत १२ मे रोजी NTA न ती रद्द केली. ह्या प्रकरणाचो तपास CBI करता.
पुनर्परीक्षेंत विद्यार्थ्यांक १५ मिनटां चड मेळटलीं
NTAन NEET-UGरी-एग्झामच्या कांय नेमांनी बदल केल्यात. परीक्षेचो काळ १८० मिनटांवेल्यान वाडोवन १९५ मिनटां केल्यांत. परिक्षा दनपरां २ वरां पसून सांजेवेळार ५:१५ वरां मेरेन (३ तास १५ मिनटां) चलतली. PwD आनी PwBD श्रेणींतल्या विद्यार्थ्यांक अतिरीक्त वेळ दिवन सांजेवेळार ६:२० वरां मेरेन परिक्षा बरोवपाची परवानगी आसतली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
