भांगरभूंय | प्रतिनिधी
वास्को: वास्कोच्या मांगूरहील वाठारांत घरा कुशीक पत्राचे शेडी कडेन खेळटना विजेच्या सरयांक हात लागिल्ल्यान अंकुश यादव ह्या तीन वर्सांच्या सानुल्याक मरण आयलें.
मेळिल्ले म्हायती प्रमाण, मांगूरहील वाठारांत रावपी शिवकुमार यादव हांचो पूत अंकुश आपल्या घरा मुखारच्या पत्राचे शेडी कडेन खेळटालो. खेळटना ताचो हात अचकीत पत्र्याक लागलो. थंय जोडिल्ले एके विजेचे सरयेंतल्यान शेडींत वीजप्रवाह देंवलो. ह्या वेळार अंकुशाक विजेचो खर धपको बसलो आनी तो थंयच कोसळ्ळो. उपरांत ताका रोखडोच चिखलेच्या उपजिल्हो हॉस्पिटलांत उपचारा खातीर व्हेलो. पूण दोतोरांनी ताका मरण आयिल्ल्याचे सांगलें. वास्को पुलिसांनी घडणूक सुवातेर वचून पंचनामो केलो. कूड पोस्टमॉर्टमा खातीर मडगांवच्या दक्षीण गोंय जिल्हो हॉल्पिटलांत सुरक्षित दवरल्या. पुलीस उपनिरीक्षक निखिल नायक देसाय फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
