भांगरभूंय | प्रतिनिधी
कुंकळ्ळे कारवाय : 20 वर्सां सावन आशिल्लो फरारी
भांगरभूंय । प्रतिनिधी
पणजी : गोंय पुलिशेच्या गुन्यांव अन्वेशण विभागान गुप्त म्हायतीच्या आदारान गोंयांत एक येसस्वी मोहीम हातांत घेतली. मणिपूरांत सक्रीय आशिल्ले आनी भारत सरकारान बंदी घातिल्ले ‘पीपल्स लिबरेशन आर्मी’ (पीएलए) हे उग्रवादी संघटनेच्या एका मुखेल फुडाऱ्याक गोंयांत अटक केली.
नोंगथोंगबाम इंगो उर्फ कृष्णा उर्फ लाल अशें (आपघोशीत लेफ्टनंट कर्नल) ह्या ‘मोस्ट वॉन्टेड’ दुबाविताचें नांव आसा. तो गोंयांत आयले उपरांत फकत कांय वरांनीच पुलिसांनी ताका ताब्यांत घेतलो.
दुबावीत नोंगथोंगबाम इंगो हो 16 जूनाक रेल्वेन गोंयांत आयिल्लो. गोंयांत आयले उपरांत तो कुंकळ्ळी आपल्या सोयऱ्यांगेर रावपाक गेल्लो. मात, तो गोंयांत येतलो अशी खात्रेशीर आनी विशिश्ट म्हायती मणिपूर पुलिसांनी आदींच गोंय पुलिशेक दिल्ली. ही म्हायती मेळटाच गोंय गुन्यांव फांटो पुराय तरेन सक्रीय जाल्लो. दुबावीत कुंकळ्ळी वाठारांत आशिल्ल्याची पक्की म्हायती मेळटाच गुन्यांव अन्वेशण विभागाचे पुलीस अधिक्षक राहुल गुप्ता, पुलीस अधिक्षक जीवबा दळवी आनी पुलीस निरिक्षक तुषार लोटलीकार हांच्या मार्गदर्शना खाला उपनिरिक्षक अमीन नायक आनी तांच्या पंगडान तंत्रीक विश्लेशण करून विशेश मोहीम हातांत घेतली. सामके फिशालकायेन माग काडून पुलिसांनी ताका ताब्यांत घेतलो.
गोंयांत अटक केले उपरांत गोंय पुलिसांनी कायदेशीर प्रक्रिया पुराय करून ताका तत्काळ गोंयांत दाखल जाल्ल्या मणिपूर पुलीस पंगडाचे सुवादीन दिलो. मणिपूर पुलिसांनी थौबल जिल्ह्यांतल्या गुन्यांवांत ताका अधिकृत तरेन अटक केली. ते उपरांत शुक्रारा विशेश सुरक्षा वेवस्थेंत ताका विमानांतल्यान मणिपूर व्हेलो. ह्या प्रकरणाचो फुडलो तपास आतां मणिपूर पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
