भांगरभूंय | प्रतिनिधी
चार जाण गंभीर जखमी, दोगांची भलायकी हुस्क्याची
भांगरभूंय । प्रतिनिधी
फोंडें : भोमा वाठारांतले सती देवीचे घुमटेक धोफरायत वचपू मोटारीचो धपको बसून जाल्ल्या अपघातांत त्रिलोकनाथ हिरेमठ (हॉस्पेट- कर्नाटक) हाका सुवातेचेरूच मरण आयलें, जाल्यार मौनेश एम (42), सचीन आळंदकर (47), बसलिंगप्पा दट्नगाव (40) आनी शिवकुमार (40. सगले रावपी धारवाड, कर्नाटक) हे चार जाण गंभीर जखमी जाले. तांचेर जीएमसींत उपचार चालू आसात. मोटारींत आडकून उरिल्ल्या तिगांक कुंडय उजो पालोवपी दळाच्या कर्मचाऱ्यांनी येवन भायर काडले. म्हाड्डोळ पुलिसांनी अपघाताचो पंचनामो केला. अपघाता उपरांत फोंडें- पणजी मार्गा वयली येरादारी कांय वेळ बंद उरली.
मेळिल्ले म्हायती प्रमाण केए 32 झॅड 4641 नंबराची मोटार पणजेचे दिशेन वताली. पूण भोमा पावले उपरांत चालकाचो ताबो सुटिल्ल्यान मोटारीचो धपको रस्त्याचे कुशीक आशिल्ले सती देवीचे घुमटेक बसलो. तातूंत मोटारींतल्या एका तरणाट्याक सुवातेचेरूच मरण आयलें, जाल्यार चार जाण गंभीर जखमी जाले. अपघाताची म्हायती मेळटाच म्हाड्डोळ पुलीस स्टेशनाचे निरिक्षक योगेश सावंत, उपनिरिक्षक माधव गावडे, सुशांत सांगोडकार आनी हेर पुलीस कर्मचाऱ्यांनी अपघाताचेर सुवातेर धांव घेतली. जखमीक तत्काळ 108 अॅम्ब्युलन्सींतल्यान जीएमसींत दाखल केले.
पुलिसांनी दिल्ले म्हायती प्रमाण अपघात जाल्ले मोटारींत आशिल्ले पांच जाण बेळगांवच्या उच्च न्यायालयांतले कर्मचारी आसात. गोंय पळोवपा खातीर शुक्रारा सांजे वेळार बेळगांव सावन गोंयांत आयिल्ले. शुक्रारा रातीं फोंडें वाठारांत रावले उपरांत सकाळीं पणजे वतना हो अपघात जालो. अपघातांत जखमी जाल्ल्या मदीं दोगांची भलायती हुस्क्याची आसा. मजगतीं, फोंडें सावन नोकरे खातीर जीएमसींत वचपी देन महिला दोतोरांनी गाडयेंतल्यान देंवून जखमीचेर मुळावे उपचार केले. ते उपरांत तांकां 108 अॅम्ब्युलन्सींतल्यान जीएमसींत व्हेले. दोन महिला दोतोरांनी मनीसपण दाखयल्ले खातीर भोमा वाठारांत तांचें कवतूक जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
