भांगरभूंय | प्रतिनिधी
प्रधानमंत्री नरेंद्र मोदी हांच्या फुडारपणा खाला भारतान आतंकवादाचेर ‘शून्य सहिश्णुताय’ हें खर धोरण आपणायलां. हे रणनिती खाला देशान प्रभावी उपाय करून आतंकवादाचें जाळें मुळां सावन हुमटावन उडोवपाची रणनिती आपणायल्या. संरक्षणा वांगडाच, अत्याधुनीक तंत्रगिन्यान वापरून वेगवेगळ्या सुरक्षा एजन्सीं मदीं सुदारीत समन्वयाक खाशेलें म्हत्व दिलां. हे फाटभुंयेचेर ही परिशद आतंकवाद विरोधी बळगें जावन उबी जाल्या, जी फाटल्या तीन वर्सांत विकसीत जाल्या. ती ठोस आनी चालीक लावंक येवपी रणनितींत रुपांतरीत करपाक एक प्रभावी मंच म्हणून मुखार येता.
राश्ट्रीय तपास एजन्सीच्या (एनआयए) आदारान आयोजीत केल्ली, आतंकवाद विरोधी परिशद डिसेंबरांत दिल्लींत जाली. धोरण निर्माते, सुरक्षा तज्ञ आनी कायदो चालीक लावपी एजन्सीचे वरिश्ठ प्रतिनिधींनी तातूंत वांटो घेतिल्लो. आतंकवादी आनी गुन्यांवकाराचे डेटाबेस ‘झिरो टॅरर’ जावंक जाय. राज्य पुलीस महासंचालकांनी ह्या डेटाबेसाचें स्वरुप चालीक लावपाची अपेक्षा आसा. फुडल्या कांय म्हयन्यांनी संघटीत गुन्यांवाचेर खर हल्लो करपाची येवजण आंखल्या.
परिशदेचें उक्तावण केंद्रीय गृह मंत्री अमित शहा हांणी केलें. तांणी सुरक्षा एजन्सींक उलो मारतना सांगलें, “भारता सयत संवसारीक पांवड्यार घडिल्ल्या सगळ्या आतंकवादी घडणुकांचो गंभीरतायेन अभ्यास करचो. तांकां संबंदीत गुप्तचर म्हायती मेळटली. तशेंच देशाची आतंकवाद विरोधी रणनिती आनी तांक अदीक घटमूट जावंक पावतली.”
बदलत्या जागतीक आनी घरगुती धोक्याच्या परिस्थितीचेर नदर ओडून तांणी सांगलें, “आतंकवादी आतां अत्याधुनीक तंत्रगिन्यानाचो वापर करतात. तांकां प्रभावीपणान आडावपा खातीर भारताक दोन पावलां फुडें रावपाची रणनिती आपणावची पडटली. फुडल्या सगळ्या आव्हानांक तोंड दिवपाक घटमूट आनी टिकावू आतंकवाद विरोधी यंत्रणा तयार करपाची गरज आसा. तेन्नाच देशाची सुरक्षा आनी सार्वभौमत्वाक फुडल्या पिळग्यां पासत राखण मेळटली.”
परिशदेचे मुखेल मुद्दे
भारताची अतंकवाद विरोधी तयारी आनी आंतर एजन्सी समन्वय घटमूट करपाचो हे परिशदेचो हेत. प्रधानमंत्री नरेंद्र मोदी हांच्या आतंकवाद ‘शून्य सहिश्णुताय’ चे नदरेक लागून हो उपक्रम प्रेरीत आसा.
पुरावे एकठांय करप, आतंकवादाच्या अर्थीक नेटवर्कांक ब्लॉक करप, आतंकवादी मॉड्यूल जॅमिंग करप. नक्षलबादीत वाठार, ईशान्य भारत आनी राश्ट्रीय सुरक्षा खातीर वेगवेगळ्या धोक्या सयत वेगवगेळ्या प्रदेशांतले अणभव सोदून काडले. डिपफेक आनी संकरीत झूज अश्या उदयाक येवपी सुरक्षा धोक्यांचो अभ्यास केलो. तेच परीं आतंकवाद विरोधी तपासांत डिजिटल फॉरेंसीक आनी डेटा विश्र्लेशणाची म्हत्वाची भुमिका, दर्यावेल्या आतंकवादाक आडोवप, बेकायदेशीर वेपार आनी आतंकवाद विरोधी न्यायशास्त्र बदलप हाचेर भासाभास जाली. खास करून डिजीटल प्लॅटफॉर्मां वरवीं कट्टरपंथीय आनी भरती प्रक्रिया आडावपाचेर भर दितात. भारतांत जावपी आंतकवादाची संबंदीत चौकट उबारप. खास करून नागरिकांचे मदीं हिंसाचार घडोवप आनी मुद्दाम भिरांत घालप म्हणल्यार आतंकवाद. भंय निर्माण करप आनी राजकी, धर्मीक वा वैचारीक ध्येय साध्य करपाक भंय घालप, व्यत्यय आनी अनिश्र्चिततायेचें वातावरण तयार करून समाजाक प्रभावीत करप इतलोच तांचो हेत आसता.
आतंकवाद ही भौशीकपणान मान्य केल्ली व्याख्या नासता. जाका लागून आंतकवादी कर्तुंबांक वर्गीकृत करप कठीण जाता. हाचो आतंकवाद्यांक फायदो जाता. कांय देश ओगी रावन, संवसारीक संस्थांनी कारवाय करतना सरळ वीटो लावन सक्षम जातात.
मल्टी – लेयर सिक्युरिटी मॉडल करात
‘आतंकवाद्यां आड निर्दयीपणान काम करप आनी मल्टी – लेयर सिक्युरिटी मॉडल केल्यारुच फुडल्या दिसांनी तें आमकां सुरक्षीत दवरूंक शकता. हे परिशदेंत तीन मुखेल उपक्रमाचें अनावरण जालें. एनआयएचें अद्दयावन गुन्यांव मॅन्युअल , जें चवकशी आनी अभियोग पद्दतीचें प्रमाणीकरण करपाक मार्गदर्शक आसा. राज्यांच्या पुलीस महासंचालकांनी अश्या मॅन्युअलाचो अभ्यास आनी अंमलबजावणी करपाक खाशेले पंगड तयार करप, देशभरांत चवकशी करप, ताचे उपरांत वगडायिल्ल्या, लुटून घेतिल्ल्या आनी मेळयिल्ल्या शस्त्रांचो डेटाबेस जाहीर करप. निमाणें संघटीत गुन्यांव जाळें डेटाबेस सुरू केलो. चड करून आतंकवादाचे समर्थक जावपी गुन्यांव सिंजिडॅटांक मोडून उडोवपाक गरजेचें. संघटीत गुन्यांवाचें जाळें सुरवेक खंडणी घेवपाचे हेतून वावर करतात. पूण तांचे फुडारी पळून वचून परदेशांत राबितो करतात. तेन्ना आपोआप आतंकवाद संघटनांच्या संपर्कांत येतात आनी खंडणींतल्यान मेळयिल्ल्या दुडवांचो वापर देशांत आतंकवाद पातळावपाक जाता. तेन्ना दरेका राज्यांत राश्ट्रीय तपास एजन्सी आनी केंद्रीय तपास ब्युरोच्या मार्गदर्शना खाला वावर करचो अशें गृह मंत्री शहा हांणी सांगलें.
परिशदेचीं खाशेलपणां
सगळ्या आतंकवादी घडणुकांचें एजन्सींनी विश्लेशण करचें. आमचीं आतंकवाद विरोधी क्षमताय आनीक वाडोवची. तशेंच एकसारकेंपण धोक्यांचें, अचूक मुल्यांकन जाय, गुप्तचरांचो योग्य वापर आनी समन्वयात्मक प्रतिकाराची खात्री करता. सरकाराच्यो सगळ्यो एजन्सी आनी राज्य पुलीस एकठांय येवन राश्ट्रीय सुरक्षे खातीर प्रभावीपणान वावुरपी ‘टीम इंडिया’ तयार करपाक जाय. कटाच्या गुन्यांवकारांक आनी मास्टर मांयडांक लक्ष्य करपाक ऑपरेशन महादेव हे आतंकवादी कट करपी आनी गुन्यांवकार दोगांयक न्यायालयांत हाडपी म्हत्वाचो उपक्रम आशिल्लो. आंतरराश्ट्रीय मळार पाकिस्तानाचो वांटो स्पश्टपणान उक्तो जाला. चवकशीचे आदेश आसात. नोव्हेंबरांत दिल्लींतल्या कार बॉम्ब स्फोट प्रकरणाची जम्मू- काश्मीर पुलिसांनी बरी हाताळणी केल्ल्याचीय केंद्रीय शहा हांणी तोखणाय केली.
उपक्रम आनी फुडाराची रणनिती
एएनआयचे अद्ययावत गुन्यांव मॅन्युएल, ऑर्गनायझड क्रायम नेटवर्क डेटाबेस आनी चवकशी प्रमाणीत करप, आतंकवाद अर्थीक नेटवर्क मोडून उडोवपाक सुरू केल्लो यत्न. हातूंत उल्लेखनीय प्रतिसाद म्हणल्यार पहलगाम हल्लो (ऑपरेशन सिंदूर आनी महादेव) आनी दिल्ली कार स्फोट, आतंकवादी धमक्यांक निश्क्रिय करून दाखयलें.
राज्यांत आतंकवादी विरोधी पंगड (एटीएस) करप, नॅटग्रिड आनी निदान हांचो सक्तीचो वापर, “Need to Know’’, Duty to Shore” सुचोवणी दिवन म्हायती वांटप आनी एकत्रीत तंत्रज्ञान – डेटा चौकटीचेर भर दिवप.
360 अंशाची रणनिती
परिशदेन संघटीत गुन्यांवांचेर 360 अंशांची व्यापक कारवाय करप आनी पळून गेल्ल्या लोकांक परतून देशांत हाडपा पासत खटले चलोवपाक गती दिवप अशे म्हत्वाकांक्षी उपक्रम जाहीर केले. आमी राश्ट्रीय सुरक्षे खातीर ‘टीम इंडिया’ बांदपाक जाय. भारत फुडें वता, तशीं-तशीं आव्हानांय वाडटलीं. मजगतीं केंद्रीय गृह मंत्री अमित शहान भारतांतले अमेरिकेचे राजदूत सर्जियो गोर हांचे कडेन बसका घेतली. आतंकवादाचेर सहकार्य वाडोवप, ड्रग्स वेव्हार आड संयुक्त कारवाय करप, शिमेची सुरक्षा घटमूट करप, दोनय देशांतल्या गुन्यांवकारांचेर खर कारवाय करप अश्या मुखेल प्रस्नांचेर दोनय फुडाऱ्यांनी सकारात्मक भासाभास केली. पूण एक मात खरें आतंकवादा आड खर पावल उखलिल्ल्यान भारत खूबच सुरक्षीत आसा हें मान्य करचें पडटलें…
विशाल सिनाय खांडेपारकार
9850465365
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
