भांगरभूंय | प्रतिनिधी
भाजपाचे कार्यकारिणी समितीचे बसकेंत कार्यकर्त्यांक सल्लो
पणजीः शेनवारा पणजे जाल्ले भाजपा प्रदेश कार्यकारिणी समितीच्या कार्यकर्त्यांक मार्गदर्शन केलें. ह्या वेळार 2027 वर्साच्या गोंय विधानसभा वेंचणुकेंत 30 जागा मेळोवपा खातीर कार्यकर्त्यांक ‘चला, उठा, तयार जायात’ हो मंत्र दिल्ल्याची म्हायती प्रदेशाध्यक्ष दामू नायक हांणी दिली. बसके उपरांत जाल्ले पत्रकार परिशदेंत ते उलयताले. ह्या वेळार केंद्रीय मंत्री श्रीपाद नायक, खासदार सदानंद शेट तानावडे आनी हेर पदाधिकारी हाजीर आशिल्ले. हाचे आदीं केंद्रीय मंत्री एल मुरुगन आनी मुख्यमंत्री डॉ. प्रमोद सावंत हांणी बसकेंत हाजीर आशिल्ल्यांक मार्गदर्शन केलें.
दामू नायक हांणी सांगलें, 209 वांगड्यांतले 197 वांगडी बसकेक हाजीर आशिल्ले. एकठांय येवन 30 जागा जिखपाचो सल्लो बसकेंत दिलो.
हे खातीर मंडळ आनी बूथ पांवड्यार पदाधिकाऱ्यांक जापसालदारकी दिल्या. केंद्र आनी राज्य सरकारांन लोकांच्या फायद्या खातीर जायत्यो येवजण्यो सुरू केल्यात. ह्यो येवजण्यो आनी भाजपा सरकारान केल्ल्या वावराक लोकां मेरेन पावपाचो सल्लो दिलो. सर्वानंद भगत हांणी स म्हयन्यांचो कामाचो अहवाल सादर केलो. तशेंच फुडाराक जावपी उपक्रमांची म्हायती दिली.
प्रधानमंत्री नरेंद्र मोदी हांणी हालींच बारा वर्सांचो कार्यकाळ पुराय केलो. ते देशांतले सगळ्यांत चड काळ आशिल्ले प्रधानमंत्री थारले. तांच्या काळांत जाल्ल्या देशाचे उदरगती विशीं म्हायती ह्या वेळार दिली. नरेंद्र मोदीक परबीं दिवपी थाराव ह्या वेळार मंजूर जालो. प्रधानमंत्र्यांची मन की बात कार्यावळ आयकुपाक, तातूंतलो आशय लोकां मेरेन पावोवप आनी कार्यावळीची म्हायती लोकां मेरेन पावोवपाक कार्यकर्त्यांक सांगलें. बसकेंत आदले मंत्री रवी नायक, यशवंत कांदोळकार आनी परेश नायक हांकां आर्गां ओपलीं. बूथांचेर वचून सरकाराच्यो येवजण्यो लोकां मेरेन पावोवपाचें उलो मुख्यमंत्र्यान मारला अशें दामू नायक हांणी सांगलें.
अँटी इनकमबन्सी ना
केंद्रीय मंत्री एल मुरुगन हांणी गोंयच्या उदरगतीचो आराखडो, केंद्रीय येवजण्यो लोकां मेरेन पावोवपाचो आनी संघटना घटमूट करपाचो सल्लो दिलो. गोंयांत अँटी इन्कमबन्सी आसा अशें म्हण्टात. पूण तशें ना अशें तांणी सांगलें. गुजरात तशेंच हेर राज्यांनी लेगीत भाजप सरकार सत्तेर आयल्यात अशें तांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
