भांगरभूंय | प्रतिनिधी
भांगरभूंय । प्रतिनिधी
पणजीः आंतरराष्ट्रीय योग दीस सुवाळ्याक आयतारा दिसा विद्यार्थी आनी शिक्षकांची हजेरी सक्तीची करपी शिक्षण संचलनालयान काडिल्ल्या परिपत्रकाचेर गोवा प्रदेश काँग्रेस समितीचे अध्यक्ष गिरीश चोडणकार हांणी खर आक्षेप घेतला. हे सारकिल्ले आदेश खाजगी सुटयेचें, कुटुंबाच्या वेळाचें आनी धर्मीक हक्कांचें उल्लंघन करतात, असो आरोप तांणी केला.
चोडणकारान सांगलें, योग ही एक पुर्विल्ली पद्दत आसा जी कुडीच्या आनी मानसीक बरेपणाक गती दिता आनी संवसारांतले लाखांनी लोक तो सदांच करतात. पूण योग उपक्रमांनी वांटो घेवप ही स्वताची पसंती आनी विस्वासाचो विशय. देखून सरकारान केन्नाच ताचें रुपांतर सक्तिच्या बंधनांत करूंक फावना, अशें तांणी म्हणलां.
आयतार हो एकूच दीस आसता जेन्ना जायत्या कुटुंबांक एकठांय येवन बरो वेळ घालोवपाची संद मेळटा. गोंयांतल्या कितल्याशाच समाजां खातीर हो प्रार्थना, उपासना आनी धर्मीक पाळणुकेचो दीस. सरकाराच्या हस्तक्षेपा बगर आपल्या भुरग्यांनी सुटयेचो दीस कसो घालप हें थारावपाचो पुराय हक्क आवय-बापायक आसा. असले निर्देश कुटुंब आनी शिक्षण संस्थांचेर गरज नाशिल्ले चेपण घालतात, अशी टिका चोडणकार हांणी केल्या.
भाजप सरकारान हें समजून घेवंक जाय की विविधतेचो आनी वैयक्तीक स्वातंत्र्याचो आदर करप ही गोंयच्या सामाजीक रचणुकेची बुन्याद आसा. खंयच्याय उपक्रमांत, वांटो घेवपाची सक्ती करपाचो खंयचोय यत्न लोकशाही मूल्यां आनी संविधानीक तत्वांच्या आड वता. मुख्यमंत्री डॉ. प्रमोद सावंत आनी शिक्षण संचलनालयान हें परिपत्रक बेगीन फाटीं घेवचें, अशी मागणी चोडणकार हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
