भांगरभूंय | प्रतिनिधी
मडगांवः फातोड्डेंच्या लिटल प्रायमरी स्कूला लागसार आशिल्ल्या अनिता अपार्टमेंटांतल्या दुसरे माळयेवेल्या फ्लॅटाक आयज शेनवारा फांतोडेर उजो लागलो. हे घडणुकेंत लाखांचें सामान लासून गोबर जालें. शॉर्टसर्कीटाक लागून हो उजो लागिल्याचो दुबाव आसा.
मडगांव उजो पालोवपी दळा कडल्यान मेळिल्ले म्हायती प्रमाण, शेनवारा सकाळीं चार वरांच्या सुमाराक हो उजो लागलो. घडणुकेची म्हायती मेळटकच उजो पालोवपी दळाचे जवान रोखडे घडणूक थळार पावले. फातोड्डेंच्या ‘अनीता’ इमारतीच्या दुसरे माळयेवेल्या समीर नायक हांच्या फ्लॅटांत हो उजो लागलो. फ्लॅट उंचायेचेर आशिल्ल्यान कर्मचाऱ्यांक उजो नियंत्रणांत हाडपा खातीर खूब कश्ट करचे पडले. निमाणे दोन बंबातल्यान उदक फवारून उजो पालयलो.
फ्लॅटांतले एके कुडींत पुराय उजो पाताळिल्लो ताका लागून भितरले सगळे सामान लासून गोबर जाले. हातूंत दोन खाटी, एसी, टीव्ही, फ्रिज, आलमारींतले कपडे आनी हेर घरगुती वस्तू आसात. हातूंत सुमार सात लाख मेरेन लुकसाण जाल्ल्याचो अदमास उजो पालोवपी दळान उक्तायला. शार्ट सर्किटाक लागून उजो लागला आसूं येता असो दुबाव आसा. पुलीस आनी उजो पालोवपी दळ ह्या प्रकरणाची फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
