भांगरभूंय | प्रतिनिधी
बंगळुरू, खबरां संस्था: बंगळुरुच्या कब्बनपेट वाठारांतल्या 14 क्रॉस रस्त्यार मोबायल चोरपाचो यत्न जालो. पूण ताचो शेवट मात एका दुबाविताच्या अकस्मात मरणान जालो.
मेळिल्ल्या म्हायती प्रमाण, एका मोटरसायकली वयल्यान आयिल्ल्या दोगांनी चलत वचप्याचो मोबायल फोन फारायलो आनी पळून वचपाचो यत्न केलो. तेन्ना त्या मनशान मजती खातीर आड्ड्यो मारल्यो. ताचो आवाज आयकून लागसार आशिल्ल्या एका मानायान चोरांक आडोवपा खातीर तांच्या मोटरसायकलीचेर तकले वयलो भरिल्लो साक उडयलो.
साकाक लागून दुबावितांचें मोटरसायकलीवेले नियंत्रण गेले. उपरांत तांकां चोरी केल्लो मोबायल फोन थंयच सोडून थंयच्यान पळ काडचो पडलो. पूण पळत वतना कांय अंतराचेर पावले उपरांत दोगां मदल्या जुनैद नांवाचो दुबावीत अकस्मात जमनीर कोसळ्ळो आनी ताका थंयच मरण आयलें. जुनैदाक पयलीं सावन काळजाचो त्रास आशिल्लो असो पुलिसांक दुबाव आसा.
पुलिसांनी दुसरो दुबावीत अरबाज हाका ताब्यांत घेतला. हे घडणुकेचे आनी चोरयेच्या यत्नाचें फुटेज थंयच्या सीसीटीव्ही कॅमेऱ्यांत कैद जालां. पुलिसांनी ते घेतलां.
ह्या प्रकरणाची हलासुरू गेट पुलीस ठाण्यांत अकस्मात मरणाची नोंद जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
