भांगरभूंय | प्रतिनिधी
चेन्नय: दोन सप्तकां मेरेन सुस्त जाल्ल्या आनी देशाच्या जायत्या वाठारांनी पावसाची व्हड तूट निर्माण केले उपरांत आतां नैऋत्य मोसमी पावस (मॉन्सून) परतून सक्रिय जावपाचे संकेत दिसपाक लागल्यात.
सुरवातेक नेटान आयिल्ल्या पावसान मदींच विसव घेतलो. पूण हवामान अदमासा प्रमाण हो मॉन्सून आतां परतून एकदां व्हड प्रमाणांत सक्रिय जावपाचे तयारेन आसा. पावसाक जाल्ल्या उसरान शेतकारांचो हुस्को वाडयलो. कारण खरिपाच्या पिकांची पेरणी करपाक शेतकार पावसाची वाट पळयत आशिल्ले.
हवामान खात्याच्या अदमासा प्रमाण, 20 ते 21 जून मेरेन तमिळनाडू, पुद्दुचेरी वाठारांतल्या कांय सुवातींनी चड पावस पडपाची शक्यताय आसा. तशेंच 20 ते 23 जून मेरेन केरळ आनी माहे वाठारांत उटंगाराचो पावस पडूं येता.
कर्नाटकाच्या दर्यादेगेर 21 ते 25 जून मेरेन व्हड पावस पडपाचो अदमास आसा. जाल्यार उत्तर आनी दक्षीण भितरल्या कर्नाटकांत 22 आनी 23 जून मेरेन मध्यम पावस पडपाची शक्यताय आसा. लक्षद्वीप वाठारांतूय 21 जून दिसा उटंगाराचो पावस येवपाची शक्याताय आसा.
उत्तर आनी मध्य भारताच्या जायत्या वाठारांनी अजून व्हड प्रमाणांत पावस सुरू जावंक नाशिल्लो. पूण कुपांचे प्रमाण आनी जोगलांचे प्रमाण पळयल्यार येवपी दिवसांनी मॉन्सून मुखार सरपा खातीर वातावरण परतून अनुकूल जावपाक लागलां हें स्पश्ट जाता.
MonsoonUpdate #RainForecast #AgricultureNews #WeatherUpdate #KonkaniNews
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
