भांगरभूंय | प्रतिनिधी
दिवचले: मुस्लिमवाडो-दिवचले काल रातीं उसरां मेरेन दुरुस्ती करूनय आयज सकाळीं हांगचें मुखेल उदकाचें पायप परत फुटलें. हाका लागून व्हडा प्रमाणांत उदकाची नासाडी जाली. हे घडणुकेक लागून दिवचल शार आनी ह्या वाठारांतली उदकाची पुरवण दुसरे दिसाय विस्कळ्ळ्या.
हे विशीं मेळिल्ले म्हायती प्रमाण, संबंदीत मुखेल उदकाचें पायप काल फुटले उपरांत भौशीक बांदकाम विभागाच्या उदका पुरवण विभागान झुजा पांवड्यार दुरुस्तीचें काम करून हें पायप सारकें केल्लें. मात आयज परत तेच सुवातेवेलें पायप फुटिल्ल्यान उदकाचो इबाड जालो.
हें पायप फुटिल्ल्यान व्हडा प्रमाणांत पिवपाचें उदक व्हावून गेलें. दुरुस्तीचें काम करून लेगीत अशे तरेन उदकाची नासाडी जाल्लयान ह्या वाठारांतल्या नागरिकांनी तिडक उक्तायल्या.
मजगतीं, ही नव्यान इबाडिल्लें पायप परत दुरुस्त करपा खातीर उदकाची पुरवण विभागान परत काम सुरू केलां. दुरुस्ती पुराय जाय मेरेन दिवचल आनी आशिकुशीच्या वाठारांतली उदकाची पुरवण बंद दवरल्या. हाका लागून नागरिकांक उदका खातीर आनीक कांय काळ वाट पळोवची पडटली.
मजगतीं, सध्या पावस नाशिल्ल्यान उदकाच्या उणावाची स्थिती निर्माण जाल्या. हे फाटभूंयेर अधिकार्यांनी नागरिकांक उदकाचो वापर सांबाळून करचो म्हूण उलो मारला. दुरुस्तीचें काम पुराय जाले उपरांत शक्य आसा तितले बेगीन उदकाची पुरवण आदले भशेन सुरळीत करतले, अशेंय स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
