भांगरभूंय | प्रतिनिधी
मुख्यमंत्री डॉ. प्रमोद सावंत हांची घोशणा
पणजीः गोंयभर ३० ते ४० हजार फ्लॅट अशे आसात जे लोकांनी बिल्डरांकडल्यान विकते घेतल्यात पूण ते अजूनय तांच्या नांवार जाले नात. देखून येता ते १५ दिसां भितर म्हजें घरा भशेन सरकार म्हजो फ्लॅट येवजण घेवन येतलें. हे येवजणे खाला लोकांचे स्वताचे फ्लॅट तांच्या नांवार जातले, अशी घोशणा मुख्यमंत्री डॉ़. प्रमोद सावंत हांणी केली.
मेरशे सहकार सेवा भवनाच्या उक्तावणा उपरांत मुख्यमंत्री डॉ. प्रमोद सावंत उलयताले. ह्या वेळार सहकार मंत्री सुभाष शिरोडकार, सांताक्रुझ मतदारसंघाचे आमदार रुडोल्फ फर्नांडीस, सहकार निबंधक आशितोष आपटे आनी हेर मानेस्त हजर आशिल्ले.
लोकांक स्वताचें घर घेवप कठीण आशिल्लें ताका लागून गृह सहकार सोसायटी तयार जावन फ्लॅट बांदलें. मात तें फ्लॅट विकतें घेतकत तो म्हजो फ्लॅट उरूंक ना, अशें मुख्यमंत्र्यान म्हणलें.
अशे पध्दतीन लोकांनी बिल्डराकडल्यान फ्लॅट विकतो घेतलो मात अजूनय तो फ्लॅट नांवार ना. तांचे कडेन फकत भागधारक प्रमाणपत्रां आसा ना जाल्यार प्रतिज्ञापत्राचे कागद आसात. मात तांचेकडेन फ्लॅटाचे खरे दस्तावेज नात. इमारत ४० वर्सां पोरणी जावन लेगीत सुवात खर्या धनयाच्या नांवार आसा आनी इमारत बांदपी बिल्डर गोंयांत ना. तांच्यो दोन पिळग्यो जावन गेल्यो तरी तांकां ती इमारत परत बांदपाक मेळना, अशें मुख्यमंत्र्यान सांगलें.
हे खातीर सहकार निबंधक, सहकार सचीव आनी महसूल सचीव सुटसुटीत म्हजें फ्लॅट येवजणेचेर काम करतात. १५ दिसांनी म्हजें घरा भशेन म्हजो फ्लॅट येवजण सरकार घेवन येतलें आनी लोकांचें स्वताचें फ्लॅट तांच्या नांवार जातलें. पयलीं सोसायटीचे एक दोन वांगडी आडमेळीं हाडटाले. मात आतां सोसायाटीचे भौवसंख्य वांगडी जो निर्णय घेता तो खरो थारतलो, अशी म्हायती मुख्यमंत्र्यान दिली.
‘सहकार से समृध्दी’ ही संकल्पना आमचे सहकार मंत्री अमित शहा हांणी देशाक दिल्या. सहकारांतल्यान जर समृध्दी घडोवपा खातीर सगळ्याच्या सहकार्याची गरज आसा, असो उलो मुख्यमंत्र्यान मारला.
भाऊन (सुभाष शिरोडकार) सांगिल्ले प्रमाण राज्यांतलो सहकार मळावेलो वेवसाय हो १० हजार कोटी वेल्यान १५ हजार कोटींचेर पावला. गोंयां भितर तशी ताका आसा आनी आमी जर मेळून काम करत जाल्यार कांय दिसां भितर हो वेवसाय २० हजार कोटी जावपा खातीर चड उशीर जावचोना. ते खातीर भागधारक आनी सोसायटी हांचो विस्वास दवरचो पडटलो, अशें मुख्यमंत्र्यान सांगलें.
जे पयशेकार आसात ते एक एकदां रीण फारीक करिनात. पूण बारीक मनशान काडिल्लें रीण तो वेळार फारीक करता. म्हणून जे रीण फारीक करिनात तांचे आड ख्यास्त जावप हे तितलेंच गरजेचें आसा, अशें मुख्यमंत्र्यान सांगलें.
गोंयांत सुमार ५६०० सहकार सोसायटी आसात, हातूंतल्यो सुमार तीन हजार गृह सहकार सोसायटी, १४५० आप मजत गट, १९८ दुद सहकार सोसायटी, १६४ सेवा सहकार सोसायटी आनी ९० गिरायक सहकार सोसायटी आसात ताचे भायर मुळाव्यो शेतकी सहकार सोसायटी, नुस्तेंमार सहकार सोसायटी, उद्देग सहकार सोसायटी, कामगार सहकार सोसायटी, उत्पादक सेवा सहकार सोसायटी आनी मल्टीपर्पस सहकार सोसायटी इतल्या व्हड प्रमाणांत सहकार मळावेलें काम हें पुराय राज्यभर चलता, अशें मुख्यमंत्र्यान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
