जिविताक विद्यापीठ थारावन सेगीत शिकत रावपाची गरज : राज्यपाल
भांगरभूंय | प्रतिनिधी
भांगरभूंय, गोवन वार्ता, द गोवन दिसाळ्यांचो वर्धापन दीस उमेदीन
दिसाळ्यांच्या सुदारीत वेबसायटीचें उक्तावण
पणजी : दरेकल्यान आपली तांक, उणेंपण, कल्पनाशक्त हांचो अभ्यास करून ताचेर विचार करपाची गरज आसा. आपलें जिवीत हेंच आपलें विद्यापीठ थारावन मनशान सेगीत शिकत रावपाची गरज आसा, असो सल्लो राज्यपाल पुसापती अशोक गजपती राजू हांणी दिलो. प्रुडंट मिडीयाच्या भांगरभूंय, द गोवन, गोवन वार्ता ह्या दिसाळ्यांच्या वर्धापनदिसा निमतान राज्यपाल गजपती राजू हांणी दिसाळ्यांच्या कार्यालयाक भेट दिली. संपादक तशेंच कर्मचार्यां कडेन तांणी संवाद सादलो. संवाद सादतना तांणी जिवितांत शिकत रावपाचो सल्लो दिलो.
इकरा वर्सां पयलीं गोंय क्रांतीदिसा प्रुडंट मिडीयाची भांगरभूंय, द गोवन, गोवन वार्ता हीं दिसाळीं सुरू जालीं. ह्या दिसाळ्यांनी मानादीक राज्यपालांचे खाशेले हाजेरींत वर्धापनदीस मनयलो. प्रुडंट मिडीयाचे संचालक ज्यो लुईस, संपादक संचालक प्रमोद आचार्य, द गोवनचे संपादक ज्योएल आफोंसो, गोवन वार्ताचे संपादक पांडुरंग गांवकार, भांगरभूंयचे संपादक महेश दिवेकार आनी हेर कर्मचारी ह्या वेळार हाजीर आशिल्ले.
राज्यपालान संवाद सादतना पत्रकार, कर्मचार्यांच्या प्रस्नांक जापो दिल्यो. कोंकणी भाशेंत ‘हेट’ ह्या शब्दाक उतर ना. राजकी पक्षांनी हाचे पसून धडो घेवपाची गरज आसा. इतिहास आनी संस्कृतींत भारत हो गिरेस्त देश आसा. आमच्या देशांत विवीध भासो आसा. आमचे संसदेचें कामकाज २० भाशांनी चलता. संवसारांत खंयच्याच देशांच्या संसदेंत इतल्या भासांनी कामकाज चलना, अशें तांणी सांगलें.
आईचो कुळदेव गोंयांत
म्हजी आई कुसुम माडगांवकार ही महाराष्ट्रांतली. आजी हिमाचल प्रदेशांतली जाल्यार पणजी उत्तर प्रदेशांतली आसा. ह्या सगळ्यांचो प्रभाव म्हजे जिणेचेर जाला. आईचो कुळदेव गोंयांत आशिल्ल्याचें सांगतात. म्हणजे हांव गोंयचो पूत जालों, अशें तांणी सांगलें. केंद्रांत नागरी उड्डाण मंत्री आसतना देशाचे आदले संरक्षण मंत्री मनोहर पर्रीकार हांचे सयत गोंयांक भेट दिल्ल्याची याद तांणी सांगली.
कर्तव्यां पाळचीं
आमचो देश हो सगल्यांत ल्हान पिरायेचो (यंगेस्ट) देश. देशाच्यो संविधानीक संस्था आपापले परीन जापसालदारकेन वावर करीत आसात. नागरिक म्हूण आपली कितें भुमिका आसात, कितें कर्तव्यां आसात, हाचो विचार करपाक जाय. तीं पाळपाक जाय अशें राज्यपालान सांगलें.
येवकाराचें उलोवप करतना संचालक ज्यो लुईस हांणी संपादक, कर्मचार्यांक परबीं भेटयतना खोशी उक्तायली. पत्रकारिता ही एक जिणेची पद्दत जावन आसा. जिणेंत उदरगती खातीर गती आसप गरजेची नासता जाल्यार सातत्य आसप गरजेचें थारता. द गोवन, गोवन वार्ता आनी भांगरभूंय ही दिसाळीं जो वावर करतात तो ह्यान फुडें लेगीत चालूच उरतलो, अशें तांणी सांगलें.
भांगरभूंय, द गोवन, गोवन वार्ता दिसाळ्यांचो हो इकरावो वर्धापन दीस आसा. सगळ्या कर्मचार्यांच्या परिश्रमाक लागून दिसाळ्यांची वाटचाल येसस्वीपणान चालू आसा. आयज इकरावो वर्धापनदीन जालो. दिसाळ्यांचें कार्य सेगीत सुरू रावून फुडाराक १११ वो वर्धापनदीस जावपाक जाय, अशी आस्त ‘गोवन वार्ता’चे संपादक पांडुरंग गावकार हांणी उक्तायली.
लोकशायेंत माध्यमांची भुमिका म्हत्वाची थारता. दिसाळ्यांचें येस हें ताचे टिमीच्या कार्याचेर निंबून आसता. द गोवन दिसाळें गोंयांतूच न्हय जाल्यार पुराय संवसारांतल्या गोंयकारां मेरेन पावता, अशें ‘द गोवना’चे संपादक ज्योएल आफोंसो हांणी सांगलें.
प्रुडंट मिडीयाचे संचालक संपादक प्रमोद आचार्य हांणी उपकार मानतना सांगलें, कल्पकताये कडेन झुज दिवन बातमी जिती दवरपाचें आव्हान आयज आमचे मुखार आसा. भांगरभूंय, द गोवन, गोवन वार्ता हीं नवीं दिसाळीं आसलीं तरी तांणी आपली एक सुवात तयार केल्या. रोहित वाडकार हांणी सुत्रसंचालन केलें.
कार्यावळींत राज्यपालाच्या जिविताचेर, १८ जून क्रांतीदिसाचेर आदारीत व्हीडीयो दाखयलो. राज्यपाल पुसापती अशोक गजपती राजू हांचे हस्तुकी ‘गोवास स्टोरीज – टेल्स ऑफ पॅराडायज’, ह्या कॉफी टेबल पुस्तकाचें लोकार्पण जालें. तशेच दिसाळ्यांच्या सुदारीत वेबसायटी, ईपेपराचें उक्तावण जालें. फोटोपत्रकार नारायण पिसुर्लेकार हांणी काडिल्लें राज्यपालांचें डिजीटल चित्र ह्या वेळार राज्यपालांक सादर केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
