भांगरभूंय | प्रतिनिधी
पेडणें: मोपा आंतरराष्ट्रीय विमानतळार इमिग्रेशन विभागाचे कागाळीवेल्यान मोपा विमानतळ पुलिसांनी एका अफगाणिस्तानच्या नागरिकाक बनावट कागदपत्रांच्या आदारार भारतीय पासपोर्ट मेळयिल्ले खातीर अटक केल्या.
हे विशीं मेळिल्ले चड म्हायती प्रमाण, १७ जून २०२६ दिसा सकाळीं सुमार २.१५ वरांचेर मनोहर आंतरराष्ट्रीय विमानतळ, मोपा हांगच्या आगमन इमिग्रेशन तपासणी मजगतीं प्रिताश सिंग ऊर्फ काशिश सिंग (२५) ह्या अफगाणिस्तानाच्या नागरिकांची चवकशी केली. ताचे कडेन अफगाणिस्तानचो पासपोर्ट असूनय तो वैध प्रवासी कागदपत्रां बगर भारतांत आयिल्ल्याचें उक्तें जालां. तपासा मजगतीं आरोपीन स्वताची वळख लिपोवन फटींग म्हायती आनी बनावट कागदपत्रां सादर करून ‘प्रिताश सिंग’ ह्या नांवान भारतीय नागरीक आशिल्ल्याचें दाखोवन दिलें. तशेंच हे बनावट वळखीचो वापर करून सरकारी यंत्रणांची फसवणूक करीत १८५५९६ नंबराचो बनावट भारतीय पासपोर्ट मेळयिल्ल्याचें उक्तें जालें.
ह्या प्रकरणांत इमिग्रेशन अधिकारी अजयकुमार जिवाने हांणी दिल्ले कागाळीवेल्यान मोपा विमानतळ पुलीस स्टेशनांत भारतीय न्याय संहिता (BNS) तशेंच इमिग्रेशन आनी फॉरेनर्स कायद्या खाला विवीध कलमां खाला गुन्यांव दाखल केलो.
पुलिसांनी आरोपीक अटक केल्या. तो सध्या बंदखणींत आसा. ह्या प्रकरणाचो फुडलो तपास मोपा विमानतळ पुलीस करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
