भांगरभूंय | प्रतिनिधी
तीन एसपी, एका पीआयाक न्यायालयाची नोटीस: फुडली सुनावणी २१ जुलयाक
पणजी : आरटीआय कार्यकर्ते काशिनाथ शेट्ये हांणी गुन्यांव फांट्या कडेन केल्ले कागाळीचेर कारवाय करूंक नाशिल्ल्यान तांणी पणजी पयलो वर्ग न्यायालयांत धांव घेतिल्ली. ह्या प्रकरणांत न्यायालयान तीन पुलीस अधीक्षक आनी एका पुलीस निरीक्षकाक नोटीस धाडल्या.
नोटीस धाडिल्ल्यां मदीं राहुल गुप्ता (गुन्यांव फांटो), जिवबा दळवी आनी हरिश्चंद्र मडकयकार ह्या तीन पुलीस अधीक्षकांचो आनी पुलीस निरीक्षक तुषार लोटलीकर हांचो आसपाव आसा.
काशिनाथ शेट्ये हांणी गुन्यांव फांट्या कडेन केल्ले कागाळींत योगेश तिगडी, पीएसआय संकेत पोखरे, पीआय गौरीश मळीक हांचे आड गुन्यांवकारी कट रचप, भ्रश्टाचार आनी पुलीस अधिकारांचो गैरवापर केल्ल्याचो आरोप करीत तांचे आड एफआयआर दाखल करपाची मागणी केल्ली. ह्या प्रकरणांत गुन्यांव फांट्यान कांयच करूंक नाशिल्ल्यान शेटये हांणी पणजेच्या पयलो वर्ग न्यायालयांत धांव घेतिल्ली. ह्या प्रकरणांत न्यायालयान आतां वयल्या पुलीस अधिकार्यांक नोटीस धाडल्या. हे विशीं फुडली सुनावणी २१ जुलयाक जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
