भांगरभूंय | प्रतिनिधी
वीज बिलांतली तफावत पयस करपाचे वीज खात्याक आदेश
पणजी : क्रांतिदिसाच्या कार्यावळींत सुटके झुजार्यांच्या २२ भुरग्यांक नोकरेची नेमणूक पत्रां भेटयतलें, अशी म्हायती मुख्यमंत्री डॉ. प्रमोद सावंत हांणी दिली. म्हज्या सरकाराच्या कार्यकाळांत १५० परस चड सुटके झुझार्यांच्या भुरग्यांक नोकर्यो दिल्यात. आतां जे ८ ते १० भुरगे उरल्यात तांकां लेगीत नोकरी मेळटली, अशें मुख्यमंत्री डॉ. प्रमोद सावंत हांणी सांगलें.
मंत्रिमंडळ बसके उपरांत पत्रकार परिशदेंत मुख्यमंत्री डॉ. प्रमोद सावंत हांणी ही म्हायती दिली. सुटके झुजार्यांच्या २२ भुरग्यांक सरकारी नोकरी दिवपाचो निर्णय मंत्रिमंडळ बसकेंत जालो.
मंत्रिमंडळाचे हेर निर्णय :
वाढीव वीज बिलांचो प्रस्न सुटावो करपाचे आदेश दिल्या.
विजेच्या लोडाची जातली तपासणी
विजेचीं जीं चड बिलां आयल्यांत तांची तपासणी करून हो प्रस्न सुटावो करपाचे आदेश वीज खात्याक दिल्या. घरातल्या विजेच्या लोडाची लेगीत तपासणी जातली. हे प्रस्न सुटावे जाय मेरेन स्मार्ट मिटर बसोवपाची कार्यवाय स्थगीत दवरतले, अशें मुख्यमंत्री डॉ. प्रमोद सावंत हांणी सांगलें. बर्याच जाणांनी मान्यताये परस विजेचो लोड वाडयला. कंत्राटदारा वरवीं विजेच्या लोडाची तपासणी करून तसो तपशील खात्याक सादर करचो, अशें तांणी सांगलें.
राज्यांत १ लाख स्मार्ट मिटर बसोवंक ना. १ लाख स्मार्ट मिटर बसयल्ल्याची म्हायती चुकीची आसा, अशें मुख्यमंत्र्यांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
