भांगरभूंय | प्रतिनिधी
पणजी : गोंय विद्यापीठ रस्त्यार बुधवारा सकाळीं रस्तो अपघात जालो. एका बिगर राज्यांतल्या वेगान वचपी गाडयेन दुचाकीक नेटान धपको दिल्ल्यान ह्या अपघातांत दुचाकी चालक आनी ताचे फाटल्यान बशिल्लो मनीस हे दोगूय गंभीर जखमी जाले. तांकां बेगोबेग लागींच्या हॉस्पिटलांत दाखल केले.
प्रत्यक्षदर्शींनी आनी थळाव्यांनी दिल्ले म्हायती प्रमाण, अपघात जाल्ली गाडी गुजरात पासिंगची आशिल्ल्यान ती मर्यादे भायर सामकी वेगान धांवताली. वेगावेल्यान नियंत्रण सुटिल्ल्यान हे गाडयेन रस्त्यावेले दुचाकीक पयलीं नेटान धपको दिलो. हो धपको इतलो नेटान आशिल्लो, दुचाकीक धपको दिले उपरांत ही गाडी रस्त्यावेल्यान सरळ कुशीक आशिल्ले मेकळे सुवातेर आनी झिलींनी वचून घुसली. ह्या अपघातांत गाडयेचें बोनट आनी बंपराचो चुकरो जालो. दुचाकीचेंय बरेंच लुकसाण जालें.
अपघाता उपरांत मुळावे चवकशेंत गाडी चालकान पुलिसांक आनी हाजीर आशिल्ल्यांक सांगलें, गाडी चलयतना ताका झेम लागली आनी हाका लागून ताचें गाडयेवेल्यान नियंत्रण गेलें. मात घडणुके सुवातेर हाजीर आशिल्ल्या थळाव्यांनी हो दावो भायर मारलो. मुखेल रस्त्यार गतीची मर्यादा निश्चीत केल्ली आसतनाय चालकान गाडयेचो वेग इतलो कित्याक वाडयिल्लो, असो प्रस्न थळाव्यांनी हाजीर केलो. फकत न्हिद आयिल्ल्याचें कारण मुखार करून इतल्या निश्काळजीपणान गाडी चलोवप समर्थनीय थारपाक शकना, अशी प्रतिक्रिया नागरिकांनी दिली.
अपघाताची म्हायती मेळटाच थळाव्या पुलिसांनी बेगोबेग घडणुके सुवातेर धांव घेवन तपास सुरू केलो. गोंयांत पर्यटना खातीर हेर राज्यांतल्यान येवपी वाहनांच्या अतिवेगाक लागून आनी निश्काळजीपणाक लागून थळाव्या नागरिकांचे सुरक्षेचो प्रस्न परत मुखार आयला. ह्या प्रकरणांत पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
