भांगरभूंय | प्रतिनिधी
पणजीः येरादारी खातें विशेश अंमलबजावणी मोहीम सुरू करतलें. हे मोहीमेंत वाहनांची पावसा आदली तपासणी आसतली, जातूंत खासा करून वाहनांची स्थिती आनी कार्यपद्दतीचेर भर दितले, अशें येरादारी संचालनालयान सगल्या वाहन धनयांक अधिसुचीत केलां.
हे मोहीमेंत येरादारी खात्याचे अधिकारी वाहनाचें विंडशिल्ड वायपर, टायर आनी हेर गरजेचे सुरक्षा- संबंदीत घटकांची तपासणी करतले. देखून खात्यान कळयलां, सगल्या वाहन धनयांनी आपलीं वाहनां रस्त्यार चलोवपाक योग्य स्थितींत आसात हाची खात्री करची आनी वयर नमूद केल्ल्या गरजांक पाळो दिवचो.
ह्या गरजांक पाळो दिलो ना जाल्यार कायद्याच्या संबंदीत तरतुदीं खाला योग्य कायदेशीर कारवाय जावं येता. ही सुचोवणी लोकहिता खातीर आनी रस्तो वापरपी सगल्यांचे सुरक्षे खातीर जारी केल्या, अशें येरादारी संचालक अरविंद खुटकर हांणी जारी केल्ले अधीसुचोवणेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
