भांगरभूंय | प्रतिनिधी
पणजीः इंटेलीजेंट ट्राफीक मॅनेजमेंट सिस्टम (आयटीएमएस) यंत्रणां बसोवपा खातीर गोंयच्या राज्यांच्या २६ सुवातांची निवड जाल्या. ३० जून मध्यान राती सावन हीं यंत्रणां अमलात येतलीं आनी कसलेच तरेचे येरादारी नेम मोडल्यार ताचो तालांव सरळ मोबायलाचेर येतलो, अशी कळोवणी येरादारी संचालनालयान जारी केल्या.
आयटीएमएस हीं तालांव दिवपाचीं ऑनलायन यंत्रणां आसात. एआय, सेन्सर आनी कंम्प्युटर व्हिजन ह्या तंत्रगीन्या वरवीं आयटीएमस रिअल टायम येरादारीच्या हालचालींचेर पाळत दवरता. तशेंच कसलेय येरादारी नेम मोडल्यार तें कॅमेर्या वरवीं नोंद करून फोटवा सयत तालांव वाहन धनयांच्या मोबायलाचेर धाडटले.
आतां सद्या ही आयटीएमएस यंत्रणां मेरशे, बिर्ला क्रॉस- वेर्णा, बेळ्ळें-नावेले, पोरणें मार्केट सर्कल-मडगांव, फातोड्डें, टाटा शो रूम-नुवें, गोवा सिरॅमिक्स- नुवें, गोरवटी-नुवें, नुवें बायपास, आर्ले सर्कल, बोळशें सर्कल-घोगळ मडगांव, मिसींग लिंक लोटली, नावेले, पॉवर हावसज सर्कल- मडगांव, मुंज विहार सर्कल- मडगांव, टायटन- वेर्णा, आयएफबी- वेर्णा, रवी कॅफे-वेर्णा, चिखली पंचायत, बेताळभाटी, ग्रीन हावस-कोलवा, मारीया हॉल- बाणावले, आंबेडकर सर्कल कुडचडें, तार-बस्तोड्यां म्हापशें, आकय- म्हापशें आनी धुळेर- म्हापशें ह्या जंक्शनाचेर कार्यरत जातलीं.
ह्या जंक्शनांचेर जर वाहन चलयतना मोबायला वापर केलो जाल्यार पयले खेपे १ हजार तालांव येतलो जाल्यार दुसरे खेपे १० हजार इतलो तालांव येतलो. ट्राफीक सिग्नलां पाळ्ळीं नात जाल्यार पयले खेपे रु. ५०० आनी दुसरे खेपे रु. १,५०० इतलो तालांव येतलो.
सीट बॅल्ट घालप ना हो पयले आनी दुसरे खेपे तालाव तशेंच हॅल्मेट घालिनात तेन्ना पयले आनी दुसरे खेपे दरेकी रु. १,००० तालांव पडटलो. ओव्हर स्पिडींगा खातीर एलएमव्ही वाहनांक रु. १००० आनी हेर वाहनां खातीर रु. २००० इतलो तालांव आसतलो.
आपतकालीन सेवांक आडमेळें हाडल्यार रु. १० हजार, नो पार्किंग आनी अनधिकृत सुवातेर गाडी थारयल्यार पयले खेपेचो तालांव रु. ५०० आनी दुसरे खेपेचो तालांव रु. १५०० आसतलो. ट्रिपल सिट दुचाकी चलयल्यार रु. १००० तालांव, बेशिस्तपणान ओव्हरटेक केल्यार पयलो तालांव रु. ५०० आनी दुसरो तालांव रु. १५००, येरादारीचे विरूध्द दिकेन चलयल्यार पयलो तालांव रु. ५०० आनी दुसरो तालांव रु. १०००, धोक्याचे पध्दतीन वाहन चलयल्यार पयलो तालांव रु. १००० आनी दुसरो तालांव रु. १० हजार, म्हालाच्या वाहनांत प्रयशांची येरादारी केल्यार पयलो तालांव रु. ५०० आनी दुसरो तालांव रु. देड हजार, फॅन्सी नंबर प्लेट वापरल्यार पयलो तालांव रु. ५०० आनी दुसरो तालांव रु. १५०० इतलो तुमच्या मोबायलाचेर येतलो.
वाहनां आड जाल्ल्या खंयच्याय नेमांच्या उल्लंघनाचो तपशील मेळोवपा खातीर तांणी तांच्या वाहनांची नोंदणी परीवहन हे वॅबसायटीचेर आनी ऑफलायन पध्दतीन संबंदीत प्रादेशीक येरादारी कचेंरेत वचून आपलो मोबायल क्रमांक अपडेट करचो, अशें येरादारी संचालनालया वतीन कळयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
