भांगरभूंय | प्रतिनिधी
गजानन किर्तीकर: ३० सुवातो लढटले
पणजी : गोंयचें भाजप सरकार जनतेच्यो समस्या सोडोवपाक अपेशी थारलां. सरकारा आड सामान्य लोकां मदीं राग वाडला. हाका लागून आमी एनडीएचे घटक जरी आसले तरी येवपी विधानसभा वेंचणुकेंत भाजपा वांगडा युती करचे नात. आमी स्वतंत्रपणान ३० सुवातांचेर वेंचणूक लढटले अशें शिवसेना गोंय संपर्क फुडारी गजानन किर्तीकर हांणी सांगलें. बुधवारी पणजे जाल्ले पत्रकार परिशदेंत ते उलयताले. ह्या वेळार उपेंद्र गांवकार, सुनील सांतीनेजकर आनी हेर पदाधिकारी हाजीर आशिल्ले.
फाटल्या एका वर्सा सावन आमी गोंयांत सर्वेक्षण करतात. हांगच्या थळाव्यां मदीं सरकारा विशीं बरोच राग आसा. शिक्षण, गरजेच्या सुविधा, भलायके वांगडा हेर मळार सरकार अपेशी थारलां. थळावे तरणाटे बेरोजगार आसा. नोकर्यो मात गोंयां भायल्यांक मेळटात. विधानसभेंत भाजपकडेन भोवमत आसा. कॉंग्रेसीच्या ११ मदल्या ८ आमदारांनी पक्षांतर केल्ल्यान भाजपा कडेन आतां निरंकुश सत्ता आयल्या. हेर विरोधी पक्षूय सामके दुबळे जाल्यात. हाका लागून जनतेच्या प्रस्ना कडेन आडनदर जाता. हाका लागूनच आमी स्वतंत्रपणान वेंचणूक लढोवपाचो निर्णय घेतला, अशें किर्तीकर हांणी म्हणलें.
आमी गोंयांत १७ ते १९ जून मजगतीं शिवसंपर्क अभियान राबयतले. १९ जुनाक पक्षाच्या ६० व्या वर्धापन दिसा निमतान पर्वरी भव्य मेळाव्याचें आयोजन केलां. फुडल्या दोन म्हयन्यांत आमी सगल्या विधानसभा मतदारसंघांनी संघटना बांदपाचेर भर दितले. बायलां, तरणाट्यांचे प्रस्न हातांत घेतले. थळाव्यांक हक्काचें स्थान मेळोवन दिवपा खातीर आमी संघर्श करतले. बूथ आनी प्रचार यंत्रणां प्रभावी करपाचेर आमचो भर आसतलो. महाराष्ट्रांत शिवसेना भाजप युती आसली तरी गोंयांत जावंकूच जाय अशें ना, अशें तांणी म्हणलें.
उपेंद्र गांवकार हांणी सांगलें, कॅगान गोंय सरकाराच्या कामाचेर बरोच फोग काडलो. कॅग अहवाला प्रमाण राज्याचेर ३० हजार कोटी रुपयां परस चड रीण आसा. हॉस्पिटलांत जाय तश्यो सुविधा उपलब्ध नात. फाटलीं कांय वर्सां राज्यांतल्या २१ लाख चौमी जमनीचें रूपांतर केलें. राज्यांत थळाव्यांक प्राधान्य दिनासतना हेर राज्यांतल्या लोकांक नोकर्यो दितात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
