भांगरभूंय | प्रतिनिधी
येवजण्यांची म्हायती करून घेवपाक लोकांनी भेट दिवची: मुख्यमंत्री
पणजी: प्रधानमंत्री नरेंद्र मोदी हांणी हालींच 12 वर्सांचो कार्यकाळ पुराय केलाे. ते निमतान गोंय सरकारा वतीन तांच्या कार्यकाळांत सुरू जाल्ल्या म्हत्वाकांक्षी येवजण्यांची म्हायती दिवपी पोस्टर प्रदर्शन चार सुवातांनी आयोजीत केल्यात. सगल्या नागरिकांनी ह्या प्रदर्शनाक भेट दिवची अशें आवाहन मुख्यमंत्री डॉ. प्रमोद सावंत हांणी केलां. मंगळारा तांणी पणजी कदंब बस स्टॅण्ड वाठारांतल्या प्रदर्शनाक भेट दिली. ह्या वेळार आमदार राजेश फळदेसाय, रुडॉल्फ फर्नांडीस आनी हेर अधिकारी हाजीर आशिल्ले.
मुख्यमंत्र्यांनी म्हणलें की, नरेंद्र मोदी हे भारताचे सगल्यांत चड काळ आशिल्ले प्रधानमंत्री आसात. ते खातीर आमी गोंयच्या लोकांचे वतीन तांचे अभिनंदन करतात.
तांच्या कार्यकाळांत केंद्रांतल्या तशेंच राज्यांतल्या डबल इंजीन सरकाराक लागून विकास कामांक गती मेळ्ळ्या. बारा वर्सांच्या काळांत नारी शक्ती, किसान शक्ती, युवा शक्ती आनी गरीब कल्याण ह्या चार स्तंभांचेर सरकार काम करता. आमी मुळाव्या सुविधां सयत मनीस विकासाक लेगीत म्हत्व दिलां. ह्याच आदाराचेर आमची विकास कामां सुरू आसात.
तांणी म्हणलें, बारा वर्सांच्या कार्यकाळांत केंद्र सरकारान विवीध लोकहिताच्यो येवजण्यो सुरू केल्यात. हांची म्हायती सर्वसामान्य लोकांक जावची हे खातीर हें प्रदर्शन आयोजीत केलां. पूण लावार्थ्यां मेरेन येवजण्यो पावोवपा खातीर लेगीत प्रदर्शन उपेगी थारतलें. हाका लागून एखाद्या तरणाट्याक शिश्यवृत्ती स्टँड अप इंडिया आनी हेर येवजण्यांची म्हायती मेळटली. अशेच पद्दतीन प्रदर्शन पणजे सयत म्हापशें, मडगांव आनी कुडचडें कदंब बस स्टॅण्ड वाठारांत 16 ते 18 जून मजगतीं आयोजीत केलां. हाचो लोकांनी लाव घेवचो.
आमदार राजेश फळदेसाय हांणी म्हणलें की, प्रधानमंत्री नरेंद्र मोदी फाटलीं बारा वर्सां बरें काम करीत आसात. तांच्या काळांत घेतिल्ले म्हत्वाचे निर्णय, येवजण्यो हांची म्हायती प्रदर्शनांतल्यान दिल्या. हाका लागून लोकांक फाटल्या बारा वर्सांत जाल्ल्या देशाचे उदरगतीची म्हायती मेळटली. केंद्रा प्रमाण राज्य सरकार ही लोकाभिमूख कामां करीत आसा. म्हजें घर येवजण हें ताचेंच एक उदाहरण आसा. विकसीत भारत 2047 आनी विकसीत गोंय 2037चे मोख पुराय करपा खातीर सगल्यांनी यत्न करप गरजेचें आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
