भांगरभूंय | प्रतिनिधी
मिर्गाच्या पावसाक नेट ना. फाटल्या 16 दिसांनी फक्त 6.52 इंच पावस पडला. म्हणजें पावसाचें प्रमाण 59.1 टक्के उणें आसा. साहजिकूच धरणांतलें उदक नेटान देंवपाक लागलां. एक धरण सोडल्यार बाकीच्या सगल्या धरणांनी पोरुंचे तुळेन उदकाचो सांठो 30 ते 50 टक्के उणो जाला. तातूंत अल निनोचो नाच सुरू जाला. पॅसिफिक म्हासागरांतलें गरम उदक वाऱ्याक लागून पूर्वे कडल्यान पश्चिमे कडेन (आॅस्ट्रेलिया, इंडोनेशिया) व्हांवता. ताका लागून खोल दर्यांतलें थंड उदक वयर येता. कांय वर्सांनी हें वारें दुबळें जाता वा मार्ग बदलता तेन्ना गरम उदक परतून पूर्वे कडेन सरकता आनी दर्यांतल्या उदकाचें तापमान वाडटा. हेंच तें अल निनो. हो सैमीक हवामान बदल. दर 2 ते 7 वर्सांनी तो जाता. माॅन्सुनाचेर तो थेट परिणाम करता. आतां 1 जुलया मेरेन पावस पडूंक ना जाल्यार राज्यांत उदकाचें संकश्ट येवंक शकता. फाटल्या 3- 4 वर्सांत अशी परिस्थिती येवंक नाशिल्ली. तेन्ना सरकाराक झुजा पांवड्याचेर उपाय येवजण करचीच पडटली.
उदकाचो दरेक थेंब हो अमृत. तो सांबाळप म्हणल्यार फुडार वांचोवप. उदका बगर पर्याय ना. सैमान आमकां उदक मुफत दिलां. ताची उधळपट्टी भविश्यांत आमकां म्हारग पडूं येता. उदका खातीर तिसरें म्हाझूज जातलें, अशें जायते जाण उलोवन गेल्यात. म्हणटकच थेंब थेंब उदक सांबाळप म्हणल्यार जिवन आनी तें फुकट घालोवप म्हणचे मरण, हें आमी घट मतींत दवरूंक जाय. सरकारान खणींनी सांठिल्लें उदक उदका शुद्धीकरण प्रकल्पांनी व्हरपाची येवजण आंखल्या. बिरेस्तारा सावन पिसुर्लेंचे खणींतलें उदक पोडोशें प्रकल्पांत हाडून शुद्ध करतले. अंजूणें धरणांतल्यान शेतां, भाटां, पोरसां खातीर जावपी उदका पुरवण बंद केल्या. फक्त पिवपा खातीर तें उदक वापरतात. हांगाचो सांठो 20 दीस पावतलो, असो अदमास. साळावली, पंचवाडी धरणांतलें उदक एक ते देड म्हयनो पावतलें. तिळारी कानलाचेंय उदक पोडोश्यां हाडपाचो विचार चल्ला.
बरेच कडेन दीस- दीसभर उदका पुरवण जायना ही गजाल खरीं आसली तरी गोंयकारांक हेर राज्यां सारके उदका खातीर वळवळे काडचे पडनात. पावस भरपूर पडटा. फाटल्या कांय वर्सांनी तर नोव्हेंबर मेरेन पावस पडला. अंदूंच्या प्रकारा कडेन एक वर्सां खातीर अशें पळयनासतना फुडलीं तीन वर्सां पावस उणो पडटलो, असो न्हयकारात्मक विचार करूनच नियोजन केल्यार बरें. सरकारी कार्यालयां सयत सगल्यांनीच रेनवाॅटर हार्वेस्टींग करूं येता. ते खातीर सरकारान साधनसुविधां वरवीं मजत करची. तळीं, झऱ्यांक पुनर्जिवन दिवप ही काळाची गरज. तळीं, न्हंयो चिखलान भरल्यात. धरणांनीय खूब चिखल सांठून उरला खंय. तो केन्ना उस्पितले? बांयो, झरे वापरूंक जाय. ताचे पयलीं ते नितळ उरतले हाची खबरदारी घेवंक फावो. चिऱ्यांचे खणींतलें उदक व्हरतले. बरी गजाल. पूण त्या उदकाची गुणवत्ता म्हत्वाची. भितर धातू, रसायन बी आसा जाल्यार ताची नेमान तपासणी गरजेची. बांद जायच. पूण थंय उदक सांठून लोकवस्तीक बादा जावंक फावना. पंप, पायपां वरवींय तें उदक धरणां, प्रकल्पां मेरेन व्हरपाक मेळटलें. विवीध मार्गांनी उदक जमनींत जिरोवचें. कारण आयज उदक जिरना, तें व्हांवन न्हंय आनी दर्यांत वता.
उदकाची गळटी, टँकर माफियांचेर नियंत्रण जायच, घरांत वापरिल्लें उदक झाडांक घालूं येता. शेतां, पोरसांनी ठिबक सिंचन पद्दत वापरल्यार शेतकार वापरता त्या उदकाची 40 टक्के तरी बचत करूं येता. उदक हें मर्यादीत आसा, हाची जाणीव जावप चड म्हत्वाचें. तेन्नाच उदकाची बचत, सांबाळ जातलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
