भांगरभूंय | प्रतिनिधी
पणजी : राज्यांत १ ते १६ जून मजगतीं सरासरी ६.५२ इंच पावसाची नोंद जाल्या. अंदूं मान्सूनच्या पावसाचें प्रमाण ५९.१ टक्क्यांनी उणें आसा. पावस नाशिल्ल्यान धरणांतलो उदकाचो सांठो नेटान उणो जायत आसा. हवामान खात्यान ह्यान पयलींच अल निनो वातावरणीय प्रणाली सक्रीय जाल्ल्याचें स्पश्ट केलां.
अल निनोक लागून मान्सुनाचें प्रमाण उणें जाता. फुडल्या कांय दिसांनी पावस जर सक्रीय जावंक ना जाल्यार राज्यांत पिवपाच्या उदकाचें संकट निर्माण जावपाची शक्यताय आसा. उदकाचो उणाव जावणचो न्हय म्हणून सरकारान आतांच्यानूच उपाय येवजण सुरू केल्या.
अंदूं राज्यांत ५ जुनाक मान्सून दाखल जाला. मात अनुकूल वातावरण नाशिल्ल्यान फाटले पांच दीस पावसाचें प्रमाण उणें जालां. मेळिल्ले म्हायती प्रमाण राज्यांतल्या स मदल्या पांच धरणांनी फाटल्या वर्सा परस उणो उदकाचो सांठो उरला. उदका स्त्रोत खात्या वतीन खाणींतल्या उदक उसपून ते जलशुद्धीकरण प्रकल्पांत व्हरपाची येवजण राबयल्या. तशेंच पेयजल खात्या वतीन प्रक्रिया केल्लें शुद्ध उदक पिण्यासाठी सोडल्यार शेती आनी हेर कारणां खातीर वापरचें न्हय हे खातीर आदेश काडल्यात.
सध्या साळावली, पंचवाडी धरणांत फुडले एक ते देड म्हयनो पावतलें इतलो उदकाचो सांठो उरला.
अंजुणें धरणांतलो उदकाचो सांठो मात नेटान उणो जाता. हाका लागून ह्या धरणांतल्यान शेती खातीर जावपी उदकाची पुरवण बंद केल्या. हांगचें उदक फकत पिवपा खातीर वापरतात. हाका लागून हांगचो उदकाचो सांठो फुडले वीस दीस पावतलो.
तशेंच ह्या धरणांतलें उदक कमी पडल्यार पिसुर्लें खाणींतलें उदक उसपून तें पडोशेंच्या जल प्रकल्पांत हाडटले. हें काम येवपी बिरेस्तार सावन सुरू जातलें.
फुडले १५ दीस जर पावस पडूंक ना जाल्यार तिळारी कानालांतलें उदक पडोश्यां हाडपाचो विचार खातें करता. तशेंच गरज आसल्यार थंय प्रक्रिया करूंक नाशिल्लें पिवपाचें उदक दिवप, कांय कडेन उदक उसपप, धरणांतल्यान जावपी विसर्ग उणो करप अश्यो विवीध उपाय येवजण्यो करतले.
चार वर्सांतलो सगल्यांत उणो उदकाचो सांठो
१५ जून २०२६ निमाणे कडेन साळावले २७.६ टक्के उदकाचो सांठो उरला. हो २०२२ पसूनचो सगल्यांत उणो उदकाचो सांठो आसा. सध्या चापोली फाटल्या चार वर्सांत सगल्यांत उणें म्हळ्यार ४०.५ टक्के उदक आसा.
दोन वर्सांतलो १५ जून निमाणे कडलो उदकाचो सांठो
(टक्क्यांत)
धरण /२०२५/२०२६
अंजुणें / ११.२९/ ९.९
पंचवाडी /५६.६५/१९.३८
साळावली / ६५.०३/ २७.६४
तिळारी / २६.९३/३०.१२
चापोली/ ६०.८४/ ४०.४
गावणें / ८४.३७/४४.११
आमठाणें / २७.९०/५१.८६
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
