भांगरभूंय | प्रतिनिधी
राज्यांत २१ जुनाक २ लाखावेर लोक करतले योगासना
पणजी : संवसारीक योग दीस अंदूं आयतारा जरी आयला आसलो तरी विद्यार्थी आनी शिक्षकांक २१ जुनाक योगा करप बंधनकारक आसा, अशें मुख्यमंत्री डॉ. प्रमोद सावंत हांणी सांगलां. राज्यांत अंदू २१ जुनाक संवसारीक योग दिसा निमतान राज्यांत २ हजारां वयर कार्यावळी जावन २ लाखां वयर लोक वाटेकार जातले. योग दिसा योग चड लोकांनी योग करपाचो राज्यांत एक नवो विक्रम जातलो, अशी आस्त डॉ. सावंत हांणी उक्तायली.
डॉ. सावंत हांणी आयज मंत्रालयांत पत्रकार परिशद घेतली. खेळां मंत्री रमेश तवडकर, मुखेल सचीव डॉ. कांडावेलू तशेंच हेर अधिकारी ह्या वेळार हाजीर आशिल्ले.
दर वर्सा राज्यांत २१ जून हो संवसारीक योग दीस मानयतात. अंदूंय ह्या दिसा राज्यांत १ हजारा वयर कार्यावळी जातल्यो. ताळगांवां डॉ. श्यामाप्रसाद मुखर्जी स्टेडियम आनी ताळगांव कम्युनिटी सेंटरांत मुखेल कार्यावळी जातल्यो. हाचे भायर शिक्षण संस्था, पंचायती, नगरपालिका, एनजीओ हांचे वरवीं कार्यावळी जातल्यो. कुंडय तपोभूमी, आयुर्वेद संस्था, ब्राह्मकुमारी केंद्र, आर्ट ऑफ लिविंग हांणी लेगीत योग कार्यावळींचें आयोजन केलां. सुटी आशिल्ल्यान विद्यार्थ्यांक घरा लागीं आशिल्ल्या कार्यावळींत योगा करपाची मेकळीक आसा. शाळा वा विद्यालयांत वचपाची सक्ती ना. योगांत वाटेकार जालो म्हूण फोटो/विडिओ शेर करपाची लींक धाडून दितले.
रक्तदाब, गोडेंमूत अश्या दुयेसां पसून राखण करपा खातीर सगळ्या गोंयकारांनी योगा दिसाचे कार्यावळीत वाटो घेवन दर दिसा योगा करपाक जाय, असो उलो मुख्यमंत्री डॉ. प्रमोद सावंत हांणी केला. सगळ्यांनी फिट रावन फिट गोंय चळवळींत वाटो घेवपाक जाय, अशें डॉ. सावंत हांणी सांगलें.
पावस नाशिल्ल्यान धरणांतल्या उदकाची पातळी उणी जायत आसा. धरणांतलें उदक आनी हेर स्थितीचो हांव नियाळ घेतलो, अशें मुख्यमंत्री डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
